2022-йисуз грантрин куьмекдалди Дагъустандин районра
авай туризмдин са жерге объектрал аваданлувилин кIвалахар кьиле тухвана
Мукьвара ЦУР-диз (Центр управления регионом) гайи интервьюда РД-дин туризмдин ва халкьдин художественный сеняткарвилерин министр Эмин Мерданова туризмдин объектрал санитариядин жигьетдай авай месэлайрикай ихтилатна.
Кьилди къачуртIа, ада хабар гайивал, объектрал санитариядин жигьетдай амална кIанзавай къайдаяр чIурнавай дуьшуьшрин гьакъиндай агакьзавай малуматриз талукь кIвалах кьиле тухузвайбурун махсус десте арадал гъанва. Министрдин гафаралди, РД-дин Кьилин ва Гьукуматдин Администрациядин, муниципалитетрин векилар, туроператорар, беледар квай и дестеди туризмдин объектрал ахтармишунар кьиле тухузва. Асул гьисабдай санитариядин жигьетдай амална кIанзавай къайдаяр чIуруникай туроператорри ва беледри дестедин амай членрив хабар агакьарзава. Гуьгъуьнлай талукь муниципалитетдин администрациядин векилрихъ галаз санал кIвалах кьиле тухузва.
Эмин Мерданова рикIел хкайвал, муниципалитетриз куьмекар гун патал Дагъустанда чкадин теклифрин грантар чара ийизва. Грантрин сергьятра аваз ахъайзавай пулдин такьатрихъ туризмдин объектрал аваданлувулин кIвалахар тамамариз, санитариядин махсус зонаяр кардик кутаз жезва.
2022-йисуз грантрин куьмекдалди Хунзах, Шамилан, Унцукуль ва са жерге маса районра авай туризмдин объектрал санузелар эцигна.
«Алатай йисуз государстводин куьмекдалди республикадин туризмдин 4 объектдал аваданлувилин кIвалахар кьиле тухвана. Тобот чарчардин патав санузел эцигна, чарчардиз килигун патал туристар кIватI жезвай чка элкъвена жугъундалди кIевна. Куьгьне Кахиб ва Куьгьне Гоор хуьрера ял ядай махсус чкаяр, зирзибил гадардай контейнерар эцигна, экв тухвана, туристар физвай рехъ гьяркьуь авуна. Гимри хуьре имам Гъазимегьамедан зияратдин патав гвай майдандал санузел ва улакьар акъвазардай пен кардик кутуна. Ибурал алава яз, аваданлувилин кIвалахар Къарабудахкент районда авай «Волна» пляждални кьиле тухвана», — лагьана Эмин Мерданова.
Интервью гудайла, министрди мадни къейд авурвал, алай йисуз Дагъустанда туризмдин 7 объектдал аваданлувилин кIвалахар кьиле тухудайвал я.
Агьмед Магьмудов
