И йикъара Дагъустандин милли политикадин ва диндин крарин рекьяй министр Энрик Муслимов Кьиблепатан Осетия республикадин президент Алан Гаглоевахъ галаз гуьруьшмиш хьана. Идакай чаз министерстводин пресс-къуллугъди хабар гана. Цхинвал шегьердиз чи республикадай делегация фин Россияди Кьиблепатан Осетиядин аслу туширвал тестикьарайдалай инихъ 15 йис тамам хьунихъ галаз алакъалу тир.

Дагъустандин делегациядик, министрдилай гъейри, РД-дин Кьилин ва Гьукуматдин Администрациядин регьбердин куьмекчи Мегьамед Хадулаев, Дагъустандин халкьдин артистка Зульфия Ильясова, РД-дин милли политикадин ва диндин крарин рекьяй министрдин меслятчи Мегьамед Мегьамедов квай.

Гуьруьшдин вахтунда Кьиблепатан Осетиядин президентди Дагъустандин кьиле алай вахтунда халис ватанперес  Сергей Алимвич Меликов  акъвазнавайди къейдна.

— Гьихьтин сувар хьурай дустар галачир! Кьиблепа­тан Осетиядин халкь патал иниз чи дустар атун важиблу тир. ­Вирида халкьдихъ галаз авай чими алакъа гьиссна, гафар гьич герекни авачир. Суварал къведалди, чаз четинвилер тIимил акунач. Амма халкьди вири манийвилериз лайихлудаказ дурум гана. Чи халкьарин тарих къадимди я. Чна санал сада-садаз куьмекун давамарзава. Сагърай куьн ихьтин важиблу сувариз чи шадвал пайиз атунай! – къейдна  А.Гаглоева.

Мадни президентди  Дагъустанда арадал атай бедбахтвилин дуьшуьшдихъ галаз алакъалу яз башсагълугъвал гана, тIар­ви­лерни хасаратвилер хьанвайбур фад сагъ хъхьун, рес­публикадиз аваданлувал хьун алхишна.

Вичин нубатдай Энрик Муслимова­ Дагъустандин Кьил Сергей Меликован тIварунихъай чими келимаяр агакьарна ва Осетиядинни Дагъустандин халкьар неинки спортда виридалайни викIегьбур, гьакI руьгьдин жигьетдайни сад-садаз мукьва тирди къейдна.

— Чаз чизва осетинар къадим тарих, адетар авай, руьгьдин, менталитетдин жигьетдай чаз мукьва халкь тирди, — алава хъувуна министрди.

Энрик Муслимован гафаралди, сувар вини дережада  къейдна.

— Аквазвайвал, республикадихъ и жигьет­дай хъсан тежри­ба ава. Шад мярекатрик Кьиб­­лепатан Осетиядин дус­тар кIватI хьанвай. Сувар саналди гурлудаказ кьиле тухвана, — лагьана ада.

Гуьруьшдин эхирдай Алан Гаглоева Энрик Муслимовазни­ Мегьамед Хадулаеваз дуствилин алакъаяр вилик тухуник еке пай кутунай ва санал кIвалахунай Дуствилин орденар гана.

Чи мухбир