28-августдиз СтIал Сулейманан райондин администрацияда жегьил спортсмен — азаддаказ кьуршахар кьунай дуьньядин кIвенкIвечивал патал акъажунрин ва Азиядин чемпион Камиль Куругълиев шад гьалара кьабулна. Идакай «Лезги газетдиз» райадминистрациядин пресс-къуллугъди хабар гана.
РикIел хкин: К.Куругълиев Къазахстандин Актау шегьерда хана ва ана чIехи хьана. Адан буба Хив райондин Цналдилай я, диде — СтIал Сулейманан райондин Агъа СтIалдилай. Камиль ва Даурен Куругълиевар имидин рухваяр я. Са йис идалай вилик кIелун ва спортдин рекьяй вичин устадвал мадни хкажун патал Камиль Дагъустандиз хтана. Алай вахтунда жегьилди ДГУ-дин юридический факультетда кIелзава. Адаз лезги чIал лап хъсандиз чизва. Агъа СтIалдал яшамиш жезвай вичин чIехи бубадал кьил чIугваз адаз гзаф кIанда.
Райондин кьил Саид Темирхановахъ галаз суьгьбетдайла К.Куругълиева, спортдин рекье къазанмишнавай агалкьунрикай хьиз, гележегдин планрикайни лагьана. Адан мурад Парижда кьиле фидай Олимпиададин къугъунра (ам Къазахстандин патай экъечIзава) иштиракун ва, гьелбетда, гъалибвал къазанмишун я. Мангистаудин областдин Олимпиададин резерв гьазурдай центрада вичин буба, Олимпиададин къугъунрин призёр Мегьамед Куругълиеван ва Роман Ахметханован гъилик устадвал хкажнавай, Къазахстандин хкянавай командадик кваз кесерлу акъажунра са шумудра гъалибвилер къазанмишнавай, гьа гьисабдай яз 92 кг заланвал авайбурун арада дуьньядин (17 йисал къведалди яшда авайбурун арада) ва Азиядин чемпионвилин (21 йисал къведалди яшда авайбурун арада) тIварарин сагьиб тир чи ватанэгьлидихъ и жигьетдай вири мумкинвилер авазва.
Спортда къазанмишнавай виниз тир агалкьунрай ва жегьилрин арада спорт машгьур авунай С.Темирханова Камиль Куругълиевав чухсагъулдин чар вахкана, адахъ спортдин рекье мадни кьакьан кукIушар муьтIуьгъардай сагъвал, кIелунрани агалкьунар хьун алхишна, дирибаш спортсмендал дамахзавайди, жегьилри адалай чешне къачузвайди къейдна ва райондин спортдин уьмуьрда активнидаказ иштиракунни теклифна. Спортсмендин тIварунихъ чими келимаяр райадминистрациядин кьилин сад лагьай заместитель Л.Оружевани лагьана. Спортдин, туризмдин ва жегьилрин крарин рекьяй комитетдин председатель Ч.Абдулмежидова ватанэгьлидихъ галаз гележегда санал кIвалахунин планарни раижна.
Рагнеда Рамалданова
