Зи вилик чIехи хьайи накьан аял Абдул-Менаф МутIалибов къе СВО-дин иштирак­чи, сержант ва хурудал женгинин IV дере­жа­дин Георгийдин хашунин орден, медалар алаз ру­х­сатдиз хтанва.­

Зегьметдин ветеран, жегьилрин хъсан насигьатчи Ке­рем Керемова гъиле яракь кьуна,  цIийи фашистринни нацистрин хура акъвазнавай ватанперес игит хцин гуьгьуьл къачун патал ресторанда гуьруьш тешкилна.

Вахт акьван йигиндиз физва хьи, пехъи душмандихъ галаз дяведин къати цIаяра лигим хьанвай жегьил итим заз стIун чир хъхьанач. Дяведин зегьмет-азият акьалтнавайди хиве кьазвачиртIани, адан вилерай чир жезвай.

МутIалибов Абдул-Менаф МутIалибович 2001-йисуз Ахцегьа зегьметкеш хизанда дидедиз хьана. 2017-йисуз хъсан къиметралди Ахцегьрин 1-нумрадин юкьван школа ва 2020-йисуз Махачкъалада Кеферпатан Кавказдин юриствилин колледж куьтягьна. Пешекарвиляй гьеле кIвалахални акъвазиз тахьанмаз, 2020-йисан ноябрдиз адаз РФ-дин Яракьлу Къуватрин жергейриз эверна. Гьа макъамда ада вич дяведин иштиракчи жедайди аннамишзавачир.

Шумал, мягькем беден авай жегьил Севас­тополь шегьерда авай гьуьлуьн пияда кьушунриз акъатна. ГъвечIи чIавалай зегьметда лигим гадади ана сифте йикъалай вич кар алакьдай низамлу аскер яз къалурна. Водителвилин ва связиствилин пешеяр чирай ада юлдашрин ва командованидин патай гьуьрмет къазанмишна. И кардин патахъай командованидилай аскердин диде-бубадин тIварцIел хтай чухсагъулдин чарчи шагьидвалзава. Къуллугъдилай кьулухъ Ватандин винел чIулав булутар кIватI жез аквазвай викIегь аскердивай къайгъусуз акъвазиз хьанач. Командирдин­ теклифдалди 2021-йисан февралдиз РФ-дин армияда амукьунин кьве йисан икьрар кутIунна. ИкI, Украинадин нацистрихъ галаз дяведин вакъиаяр башламиш хьайи сифте йикъалай МутIалибова къуллугъзавай гьуьлуьн пехота­дин 810-бригада къати женгерик экечIна. Дуьз 10 йикъан къене абуру Мелитополдин аэродром ва шегьер кьуна ва 9-мартдилай Мориуполдин патарив яргъал чIугур женгера иштиракна, ахпа Угледардал фена.

– Абдул-Менаф, душмандихъ галаз женг чIугвазвай фронтдин сифте жергейра аваз, якъин, хаталу дуьшуьшар кьилел пара атана жеди. Амма СВО-дин зонада къалурай кьетIен викIегьвилерай 2023-йисан 3-мартдиз РФ-дин Президент В.В.Путинан Указдалди «Орден Георгия – Георгиевкого креста IV степени (№ 08448)» ваз женгинин гьи дуьшуьшдай гана? – хабар кьазва чна аскердивай.

– Душмандин гужлу артобстрелдикай спецаппаратура алай чи машин ва хирер хьанвай юлдашар хкудунай, – яцIу гафар лугьун тавуна, агъайнавиляй куьрелди жаваб гузва ада.

– Куь бригадада мад дагъустанвияр авани? Алай вахтунда гьина женг чIугвазва? Ас­керрин женгинин руьгь гьикI я? ТIуьн-хъунин, яракьрин патахъай четинвилер авач гьа…? – ислягь девирда дяведа авай жегьилрин патахъай дерт чIугвазвай суалар вугузва чна.

– Чи бригадада дагъустанвиярни, чеченвиярни гзаф ава. Сада-садаз, хайи стхайри хьиз, куьмекзава. Дяведа масакIа жедач. Алай вахтунда чна Запорожьеда Крымдиз фидай рекьел алай Работино хуьр кьунва. ТIуьн-хъунин, яракьринни дяведин суьрсетрин патахъай са дарвални авач. Эхиримжи вахтунда цIийи техника — модернизироватнавай «АК-12» автоматар, винтовкаяр, «Т-90» танкар ва маса яракьар къвезва. Кьилинди, чи аскерар руьгьдиз къуватлу я. Гъалиб жедайдал гьич шак алач, — инанмишвилелди лугьузва ада.

Газетдикай менфят къачуналди, жегьилрихъ элкъвена, лугьуз кIанзава: гьуьрметлу дустар, Ватандал яракьлу душман атанвайла, чаз кисна ацукьдай ихтияр авач. Диде-буба, хизан хуьн патал чун баркаллу бубайрин викIегь рухваяр тирди женгина къалурдай вахт атанва. Чун сад хьайитIа, душман фад кукIварда. Чи женг Ватан хуьзвай гьахълуди тирвиляй чун гъалибни жеда.

Дашдемир Шерифалиев