Вичин ери-бине Ахцегь райондин КьакIарин хуьряй тир ва алай вахтунда Саратов шегьерда яшамиш жезвай жегьил спортсмен Агьмед Агьмедовакай кьве муштулух санал гуз кIанзава.
ИкI, и йикъара Орёл шегьерда Россиядин 44 региондай тир 330-дав агакьна спортсменрин иштираквал аваз каратэдай (Олимпиададин къугъунрин версиядай) кьиле фейи уьлкведин чемпионатда 67 кг-дал къведалди заланвал авайбурун арада ада чемпионвилин тIвар къазанмишна. Алай вацран эвелра Белоруссияда кьиле фейи СНГ-дин уьлквейрин къугъунрани жегьил спортсменди къизилдин медаль къазанмишна.
РикIел хкин: А.Агьмедов спортдал 5 йиса авайдалай инихъ машгъул жезва. Ам дуьньядин Кубокдин сагьиб, хейлин турниррин ва акъажунрин гъалибчи ва призёр я. Ада вичин буба, каратэдай Россиядин 3 сеферда чемпион, спортдин мастер, чIулав чIулунин сагьиб, Саратовдин областдин лайихлу тренер Ихтибар Агьмедован гъилик устадвал хкажзава.
Рагнеда Рамалданова
