Махачкъалада кьезил атлетикадай Еле­на Исинбаевадин тIварунихъ галай стадиондал виликан тIвар эхцигнава. Стадиондал виликдай алай тIвар эхцигуниз талукь цIийи къарар  Дагъустандин Гьукуматдин премьер-министр Аб­дул­муслим Аб­дулмуслимова раижна.­ «Дагъустан Рес­публикадин «Елена Исин­баевадин тIварунихъ галай стадион» ГБУ»  «Труд стадиондиз» элкъуьр хъийин», — кхьенва документда.

РикIел хкин: виликдай, яни вич эцигай 1967-йисалай 2017-йисал къведалди, тамам зур асирда «Труд» тIвар алаз виридаз машгьур стадион ругуд йис идалай вилик (2017-йисуз) пая гваз хкадарунай Олимпиададин чемпионка Елена Исинбаевадин тIварунихъ янай.

Стадиондиз талукь дегишвиликай региондин Кьил Сергей Меликова алай йисан июлдиз хабар ганай. Ада къейд авурвал, Е.Исинбаева бажарагълу спортсменка я, амма ада вичин я алатай йисар, я гележег Дагъустандихъ галаз алакъалу авунач. Стадиондин тIвар дегишарун лагьайтIа, спортсменкади Россиядикай лугьузвай гафарихъ галаз алакъалу я.

Са тIимил вахт идалай вилик Е.Исин­баевади вичи 2023-йисан сентябрдилай МОК-дихъ (Международный Олимпийский Комитет) галаз кIвалахун давамардайдакай хабар ганай, 2016-йисалай ам и комитетдин член я. Ада кьетIендаказ къейднавайвал, алай вахтунда МОК-дихъ «гьич са жуьрединни шаклувал авач» ва «гьич са жуьрединни статьяйрик ва санкцийрик» ам акатзавач. Виликдай СМИ-ра спортсменкадин РФ-дин Яракьлу Къуватрихъ галаз вучтин алакъа, шериквал аватIа ахтармишуникай хабар чкIанвай.

Спортсменкади вичин рахунра къейдзавайвал, 2018-йисалди ам ЦСКА-дин патай экъечIна, виниз тир тIварар ва шабагьар къазанмишна. Амма абурухъ «агъа кIа­нин къимет» («номинальный характер»)­­ ава. Мадни ада чи уьлкведиз садрани къуллугъ авунач, депутат ва я са гьихьтин­ ятIани партиядин член хьанач. МОК-ди­ спорт­сменкадин жигьетдай наразивал ва истемишунар авачирди тестикьарнава­, гьикI хьи, ада «Россиядин Яракьлу Къуват­рихъ ва я хатасузвал таъминардай орган­рихъ галаз икьрардин бинедаллаз кIвалахнач, Украинада кьиле тухузвай дяведин махсус серенжемдин тереф хвенач».

РФ-дин спортдин министр О.Ма­ты­ци­на, вичин нубатдай яз, спортсменкади аскервилин чинриз, гражданвилин позициядиз талукь яз лугьузвай гафар рехъ гана виже текъведайбур яз гьисабна.

Вирироссиядин халкьдин фронтди (ОНФ) июлдин эхирра Е.Исинбаева вичин кьилин штабдикай хкудна.

Спортсменка Испанияда яшамиш жезва.