Алатай гьафтеда газет чапдиз вахкузвай вахтунда Белоруссиядин Солигорск шегьердай чав шад хабар агакьна: чна вирида вилив хуьзвай акъажунра – СНГ-дин уьлквейрин II къугъунра – вичин ери-бине Ахцегьай тир, амма Азербайжандин патай экъечIзавай Жабраил Гьажиева 74 кг-дин заланвал авайбурун арада къизилдин медаль къазанмишна.
ИкI, азаддаказ кьуршахар кьунай (чна виликан нумрада хабар гайивал, СНГ-дин уьлквейрин II къугъунар Белоруссиядин са шумуд шегьерда спортдин са шумуд жуьредай кьиле фена) акъажунрин (ана дуьньядин 13 уьлкведин спортсменри иштиракна) финалдин бягьсина Ж.Гьажиеваз Хасавюртдай тир спортсмен Имам Гонишовахъ галаз вичин устадвал къалурун кьисмет хьана. Акьван гагьди абуру и къугъунра пуд бягьс кьиле тухванвай, чпин алакьунар къалурнавай.
РикIел хкин: 2018-йисалай Азербайжандин хкянавай командадик кваз вичин устадвал къалурзавай Жабраил Гьажиева шаз 21 йисал къведалди яшара авайбурун арада дуьньядин ва Европадин чемпионатра гъалибвилер къазанмишна.
Рагнеда Рамалданова
