И йикъара зун са дустни галаз жуваз фадлай таниш, газетрайни журналрай чизвай гьуьрметлу муаллим, шаир, адалатлу кIвалахрин сагьиб Велибегов Рамазан Шагьпазовичаз мугьман хьана. Чи арада адан уьмуьрдикай, зегьметдин рекьикай суьгьбет кьиле фена.
Рамазан Велибегов 1939-йисуз Хив райондин Цналрин хуьре лежбердин хизанда дидедиз хьана. 7-класс акьалтIарайдалай кьулухъ ада кIелун Хивдин школа-интернатда давамарна. 1964-йисуз Рамазана Хасавюртдин педучилище акьалтIарна. Кьве йисуз кIвалахайдалай кьулухъ ам ДГУ-дин тарихдин факультетдик экечIна, 1971-йисуз хъсан къиметралди акьалтIарна.
Университетда кIелзавай йисара Р.Велибегов алимар-арабистар Гъалиб Садыкъи, Амри Шихсаидов ва масабурни галаз хайи край чирдай крарал машгъул тир. Кьиблепатан Дагъустандин шегьерриз, хуьрериз физ, эгъуьндайла, жагъай экспонатар Дагъустандин музейриз агакьариз хьана.
1979-1981-йисара, кIвалахдивай къерех тахьана, Москвада колхозрин, совхозрин руководителар гьазурдай школа куьтягьна.
Рамазан муаллим Аллагьдин патай пай ганвай, гьар жуьредин алакьунар авай кас я. Алай вахтунда адан гъиле жуьреба-жуьре рекьерай материалар кIватIзавай 6 дневник ава. Аял вахтарилай газет-журналрихъ галаз алакъа хуьз, ада анриз макъалаяр, шиирар кхьиз хьана. Рамазан Шагьпазовича чи кьегьал хва Шарвилидиз бахшна, цIудралди макъалаяр чкадин ва республикадин газетра чапна. Пудкъад лагьай йисарилай башламишна, ада, дуьньяда, республикада, районда кьиле физвай вири дегишвилерикай материалар кIватIиз, дневникар гьазуриз хьана.
Рамазан муаллимди республикада акъатзавай газетар, кьилди къачуртIа, «Лезги газет» гьамиша кхьизва, и кардал амайбурни руьгьламишзава.
2008-йисуз Рамазан Шагьпазовича Цналрин, Цлахърин хуьрерикай тарихдин, 2009-йисуз, 70 йисан юбилейдихъ галаз алакъалу яз, «Аламатдин къванер» ктабар акъудна. Насигьатчи агъсакъал Р.Велибегова, ЧIехи Гъалибвилиз талукьарна, дяведа телеф хьайи Хив райондин агьалийрин шикиларни аваз, «Гъалибвилин паркуна» ктаб чапдай акъудна.
Рамазан Шагьпазович михьи рикI авай, къастунал кIеви, гьахъвал кIандай инсанрикай сад я. Адаз хуьруьнвийри лайихлудаказ гьуьрметзава.
Рамазан муаллимди хизан лап жегьилзамаз кутуна — 21 йисан яшда аваз, ада вичин хуьруьнви Шамсудинан руш Зулфижатахъ галаз сир сад авуна. Зулфижата Рамазаназ 5 хвани 5 руш багъишна. Вирида адан гьуьрмет хуьзва, бубадихъ гелкъвезва. Рамазана вичин бахтлу хизандилай разивалзава.
Хва Физулиди Ставрополдин хуьруьн майишатдин институтдин экономикадин факультет куьтягьна, 1982-йисалай гьана кьилин экономист яз кIвалахзава. Велибег, Ставрополда ветеринариядин факультет акьалтIарна, 1993-йисалай маларин духтур я. Вадим 1998-йисуз Москвадин социальный университетдик экечIна. Ам Цналрин хуьруьн школадин директор я.
Рушар, гьар жуьредин юкьван чирвилер къачуна, хизанарни галаз гьарна яшамиш жезва.
Рамазан Велибегов РФ-дин умуми образованидин Гьуьрметлу къуллугъчи, халкьдин просвещенидин отличник, муаллим-методист я. Адан зегьмет РД-дин гьукуматдин грамотайралди къейднава. Гьуьрметлу гражданин Октябрдин инкъилабдин ордендин сагьиб я.
1964-йисалай КПСС-дин член, зегьметдин ветеран, Хив райондин общественный палатадин начальникдин заместитель, райондин гьуьрметлу агъсакъал. Рамазан Велибегова алай вахтунда Хив райондин чкIанвай хуьрерикай тарихдин ктабдал зегьмет чIугвазва.
Гьукуматдиз, халкьдиз намуслувилелди, михьи рикIелди къуллугъзавай гьар са касдиз чна рикIин сидкьидай чухсагъул лугьузва. Рамазан муаллимди чирвилер, тербия гайи аялри къе Россиядин гьар сана намуслувилелди гьукуматдин важиблу кIвалахрал зегьмет чIугвазва. Баркалла чпиз. Абуру хуьруьн, райондин, республикадин тIвар вини дережада аваз хуьзва. Рамазан Велибеговахъ галаз суьгьбет авурдалай кьулухъ къелемдин дуст Тагъи Мегьамедовни галаз чун хуьруьн школадал, мискIиндал ва библиотекадал фена.
Гуьгъуьнлай чна Рамазан муаллимдиз РФ-дин писателрин Союздиз кьабулун мубаракна, мадни агалкьунар хьун алхишна.
Вадим Жамалдинов
