Хив райондин Цналрин хуьруьн ктабханадин 70 йис хьанва. Библиотека авай кIвал гъвечIиди ятIани, ам кутугай къайдада туькIуьрнава. Дараматдин къенез гьахьайвалди, зи вил шаир Расул Гьамзатован суьретда акьуна. Цларал, столрал алай писателрин, шаиррин шикилриз ва ктабриз килигайдалай кьулухъ за библиотекадин заведующий Рамазанова Селимат Гьасановнадихъ галаз суьгьбетна.
Хуьруьн школа куьтягьайла, Селимата Дербентдин педучилищедин библиотекадин отделение акьалтIарна. 2013-йисалай ада библиотекадин заведующий яз кIвалахзава. Хуьр акьван чIехиди туштIани, ктабар къачуз, газетар, журналар кIелиз къвезвайбурун кьадар тIимил туш. Библиотекадин фондуна 7537 ктаб ава.
Суваррин йикъара — ЦIийи йисуз, 8-Мартдиз, 9-Майдиз, шаиррин, писателрин юбилеяр хьайила, ина шадвилин мярекатар кьиле тухузва. Мярекатра хуьруьнвийри, школьникри ашкъидивди иштиракзава, манияр язава, шиирар кIелзава. Районда кьиле тухузвай конкурсрани библиотекади мукьвал-мукьвал кIвенкIвечи чкаяр кьазва. Ктабханади гьар кварталра авунвай кIвалахрин гьахъ-гьисаб тухузва, фикирда авай мярекатрин план туькIуьрзава ва ам райондин кьилин библиотекадин директордихъ галаз веревирдзава.
Ктабханадин кIвалах райондин руководстводи са шумудра грамотайралди, чухсагъулдин чараралди къейдна. Чун библиотекадиз фейила, Селимат Гьасановнади ана кIелдайбурухъ галаз суьгьбетзавай. ЧIимел йикъара, кIвалах тIимил хьайила, газетар, журналар кIелиз къвезвайбурун кьадар артух жезва.
Селимат Гьасановнади вичин рикI алай кIвалах, пеше намуслувилелди кьиле тухузва. Адаз хуьруьнвийрин патай гьуьрмет ава. Селиматан ва и хуьруьнви Рамазанов Басиран бахтлу хизанда цуьквер хьтин 3 руш чIехи жезва.
Вадим Жамалдинов
