СтIал Сулейманан райондин КIварчагърин хуьруьн М.Къараханован тIварунихъ галай мектебда, «Школайрин образованидин къурулушар алай аямдив кьадайвал туькIуьрун» госпроектдин сергьятра аваз, бинедилай ремонт авунин кIвалахар кьиле тухузва. Алай йисан майдин вацра гъиле кьур и кIвалахар кьиле физвай гьалдихъ галаз и йикъара муниципалитетдин кьил Саид Темирханов таниш хьана, хабар гузва райондин информациядин центради. Талукь тир къурулушрин кьиле авайбурухъ галаз санал С.Темирханова ремонтзавай дараматар ва патарив гвай чкаяр, мектебдин гьаятар авай гьал ахтармишна, школадин директордихъ ва пудратдин тешкилатдин векилдихъ галаз ихтилатарна, ремонтдин кIвалахрин еридиз къимет гана, мектеб кIелунин цIийи йис алукьдалди гьазур хьунин мумкинвилериз килигна.
Алай вахтунда, райондин кьилиз хабар гайивал, объект тахминан 95 процентдин гьазурлухвилин гьалда ава: чирвилер гудай дараматдин къав, электропроводка ва экв гудай тадаракар, пенжерар ва ракIарар дегишарнава, классрин цлар сувагънава, ширер янава, лазим тир саки вири мебель агакьарнава. Чимивал гудай цIийи къурулуш туькIуьрна куьтягьзава. Кьвед лагьай дараматдин къецепатан цлар туькIуьрзава, дегьлизра чиле плитка твазва, классра ламинат экIязава. Дараматрикай сада санузел чими жедайвал туькIуьрзава. Ремонтдин вири кIвалахар са шумуд йикъан вахтунда тамамдаказ акьалтIарун фикирда ава.
Райондин кьили, хабар гузвайвал, авай нукьсанрин патахъай тагькимарна ва абур тадиз арадай акъудун лазим тирдакай лагьана – 1-сентябрдиз мектеб ученикар кьабулиз гьазур хьун лазим я.
Къейд ийин, умуми образованидин мектеб КIварчагърин хуьре 1962-йисалай кардик ква. Ана 240 аялдиз чкаяр ава. Гьакъикъатда лагьайтIа, алай вахтунда мектебда тахминан 150 аялди кIелзава. Директор Насир Къурбанова суьгьбет авурвал, мектеб алай аямдин истемишунриз жаваб гузвайди туш. Бинедилай ремонтни ана садрани авунвач. Анжах муаллимрин коллективди гьар йисуз са тIимил ремонтар ийизвай. Мектебдин алай вахтунда капремонт ийизвай дараматар 1974 ва 2005-йисара дагъдин къванцикай эцигна. Дараматар, иллаки кьвед лагьай корпус лап куьгьне хьанва. Анжах 2021-йисуз, «Чкайрилай теклифар» проектдин сергьятра аваз, адан къав дегишарна. «Мектебдин капремонт эхирдив агакьзава. Амайбур къецепатан ва къенепатан бязи крар, гьаятдин майданар аваданламишунин ва михьунин кIвалахар я. Фикирзава хьи, кIелунин йис башламишдалди, абурни кьилиз акъудда. Капремонтдилай кьулухъ дараматар алай аямдин истемишунриз жаваб гузвайбур ва аялар патал къулайбур, хатасузбур жеда. Вири и крари чирвилер гунин ва тербияламишунин кIвалахриз хъсан патахъай таъсирда, чи муаллимар чпин пешекарвилин дережа мадни хкажунал гьевесламишда», — баянар гана директорди.
ГьакIни и йикъара Саид Темирханова Агъа СтIал-Къазмайрин цIийи мектеб ачухуниз гьазур хьунихъ галаз алакъалу месэлаяр веревирд авур совещание кьиле тухвана. И хуьре цIийи мектеб ачухун район патал лишанлу вакъиа жеда. Ам ачухунин мярекат, райондин кьили къейд авурвал, тешкиллувилин вини дережада аваз кьиле фин лазим я.
400 аялдиз чкаяр жедай, «Хуьрерин мулкар вири патарихъай виликди тухун» госпрограммадин сергьятра аваз, меценат Салман Бабаеван куьмекдалди эцигнавай школа районда образованидин виридалайни чIехи объект хьун лазим я. И госпрограммада иштиракунин мумкинвал муниципалитетдиз адан мулкунал АПК-дин хилен зурба инвестпроектар уьмуьрдиз кечирмишуникди хьанва.
Санлай къачурла, РД-дин образованидин ва илимдин министр Ягья Бучаеван гафаралди, алай йисуз республикадин 139 мектебда бинедилай ремонт авунин кIвалахар кьиле тухузва. Эхиримжи делилралди, 74 мектебда капремонт тамамдиз акьалтIарнава.
Амина Муслимова
