Советрин Союздин вири пипIера агьалийрин, иллаки акьалтзавай несилдин, савадлувал дуьзгуьн дережадиз гъун патал урус муаллимри хуьрерани шегьерра зегьмет чIугуна. Республикада лап машгьур хьайи муаллимрикай сад Каспийск шегьердин 2-нумрадин юкьван школадин директор хьайи Деревянко Петр Николаевич тир.
Петр Николаевич Запорожьедин областдин (виликан Екатеринославский губерния) Александровский уезддин Вини Терс хуьре 1901-йисуз дидедиз хьана. 1927-йисуз ада Киевдин образованидин институт куьтягьна ва Запорожьедин школайра аялриз тарсар гана. 1935-йисуз муаллим Дагъустандиз, «Двигательстрой» завод эцигзавайбурун поселокдиз рекье туна. Ам вичин пешедал рикI алай, гьахъвал гвай, вичивайни, вичихъ галаз алакъалу гьар садавайни дуьзгуьн истемишунар ийидай ва вичел тапшурмишнавай кIвалахдай еке жавабдарвал гьиссдай кас тир. Адан пешекарвал, аялар кIан хьун, тарсар гунин ерияр гъиле-гъил аваз акуна. Гьавиляй, са акьван вахт арадай тефенмаз Деревянкодал завучдин, ахпа школадин директордин везифаяр ихтибарна.
Гитлеран Германияди Ватандал вегьейла, хайи маканар фашистрин гъиле гьатайла, Петр Деревянкони фронтдиз рекье гьатна. Ада Кавказдин республикаяр душмандикай хуьнин женгера иштиракна. Нубатдин женгина залан хер хьайи муаллим госпиталдиз аватна. Ам биши хьана. ЯтIани, аскер-муаллим Каспийскдиз хтана ва ада рикIиз хуш кар давамарна.
1946-йисалай 1960-йисалди Деревянкоди 2-нумрадин юкьван школадин коллективдиз регьбервал гана. Ам вичин хизан галаз школадин дараматдай чара авунвай гъвечIи кIвале яшамиш жезвай, яни, лугьудайвал, школа адаз кIвални, кIвалахни, машгъулатни, са гафуналди, вири тир. Адан уьмуьрдин юлдаш Александрадини гьа школада кIвалахзавай. Ахпа ада шегьердин ОНО-да зегьмет чIугуна.
Гьелбетда, япар биши хьуни кIвалах четинарзавай, амма устад пешекар юзазвай пIузарри вуч лугьузватIа, гьадан гъавурда гьатзавай. Гьавиляй адаз кIанивилелди, гьуьрмет авунивди муаллимрин муаллим лугьузвай.
Деревянкоди регьбервал гузвай школа Дагъустанда лап хъсанди яз гьисабзавай. РСФСР-дин школайрин арада ам кьвед лагьай чкадал алай. Адалай педагогвилин мягькем, бажарагълу дуствилин, коллектив арадал гъиз алакьна. Ада регьбервал гузвай йисара школа куьтягьай саки вири жаванар, жегьилар республикадин, СССР-дин вузрик экечIна. Бажарагълу пешекарар хьана, абуру уьлкведин къудратлувал патал зегьмет чIугуна. Образованидин хиле къазанмишай агалкьунрай Петр Деревянко «Зегьметдин Яру Пайдах» ордендалди, «Халкьдин образованидин отличник» лишандалди, «Зегьметда тафаватлувиляй», «Зегьметдин жуьрэтлувиляй» медалралди ва «ДАССР-дин лайихлу муаллим» тIвар гуналди къейдна.
Хийир Эмиров
