Алатай гьафтеда «Дагъустан» РИА-да кьиле фейи пресс-конференцияда Дагъустан Республикадин милли сиясатдин ва диндин крарин рекьяй министр Энрик Муслимова ва Махачкъаладин «Марва-Тур» офисдин регьбер Булат Къурбанова иштиракна. Дагъустандин СМИ-рин векилриз абуру гъилевай йисуз республикадин агьалияр гьаждал фена хтун тешкилай гьалдикай суьгьбетна.
— Сифте нубатда са кар къейд ийиз кIанзава: алай йисуз дагъустанвияр Саудрин Аравиядиз зияратдал финин месэла лап виниз тир еридивди тешкилнавай. Республикадин мусурманар Меккадиз, Мединадиз рекье тунин, абуруз анра къулай шартIар тешкилунин, яшайишдин месэлаяр гьялунин ва маса крарихъ галаз алакъалу вири къурулушри жавабдарвилелди кIвалахна, чи агьалийрин патай наразивалдай гьалар арадал гъанач. Куь рикIел аламатIа, тIугъвалдихъ галаз алакъалу яз, кьве йисуз чи инсанриз гьаждал фидай мумкинвал хьаначир, — лагьана Э.Муслимова. — ЦIи Саудрин Аравияди дуьньядин саки вири уьлквейрай са миллиондилай гзаф ксариз гьаж кьиле тухудай ихтияр ганвай. Россиядиз ганвай квотайрин кьадарни тIимилди тушир — 25 агъзур касдилай артух. Идакай Дагъустандал саки са пай ацалтна. ЦIи Дагъустандай Саудрин Аравиядиз гьаждал 11140 кас фена, хтана. Икьван кьадар чкаяр Дагъустандиз садрани гайиди тушир. Россиядин мусурманар яшамиш жезвай маса регионрайни гьаждал са сефердани икьван инсанар фенвач. И кардини Саудрин Аравиядин пачагьлугъдини Россиядин гьукуматди мусурманриз гьихьтин ихтибарзаватIа къалурзава. Чи инсанар вахтунда чкадал агакьариз ва анай хкиз алахъай «Марва-Турдини» вичин кIвалах хъсандиз тешкилна. И карда адахъ хъсан тежриба хьанва.
Мадни къейд ийиз кIанзава,- давамарна ихтилат Э.Муслимова,- са агъзур дагъустанви чи ватанэгьли, сенатор Сулейман Керимован мергьяматлувилин фондунин куьмекдалди фена. Абурукай 200 чка Украинада кьиле тухузвай военный махсус серенжемда телеф хьайибурун диде-бубаяр, багърияр патал чара авунвай.
— Зун Энрик Селимовичан ихтилатрихъ галаз рейсад я, — малумарна Булат Къурбанова. — Чаз Саудрин Аравиядин пачагьлугъдин векилрин патай наразивилин гафарин ван атанач. Гьелбетда, вири месэлаяр регьятдиз алатнач. Россиядиз малумарнавай къадагъайрин цIай чахъни галукьна. Чун пулунин гьахъ-гьисабар маса уьлквейрин банкарин куьмекдалди авуниз, зияратчияр маса государствойрин (Кувейт, Дубай, Тажикистан) самолётрин куьмекдалди агакьаруниз мажбур хьана.
Журналистри гьаждал финин къиметар хейлин хкаж хьунин месэладикай хабар кьурла, Б.Къурбанова икI лагьана: «Ина чи тахсир авач. Эгер кьве йис вилик Саудрин Аравияди са зияратчидиз ийизвай къуллугърай 300 доллар къачузвайтIа, цIи и рекъем 2000 доллардив агакьна.
Нариман Ибрагьимов
