15-августдиз Дагъустандин Кьил Сергей Меликова республикада кардик квай АТК-дин (Антитеррористическая комиссия) заседание кьиле тухвана. «Лезги газетдиз» РД-дин Кьилин пресс-къуллугъди хабар гайивал, адан сергьятра аваз автотранспортдин инфраструктурадин объектрал, мектебрани вузра хатасузвал таъминарунин, кIелунин цIийи йисан къаршида гзаф кьадар инсанар кIватI жезвай чкаяр хуьнин жигьетдай авай гьалариз, кьабулзавай серенжемриз талукь месэлаяр веревирдна. Мярекат, 14-августдиз Махачкъалада АЗС-ни автосервис хъиткьинунин нетижада телеф хьайибурун къаматар эбеди рикIера хуьнин лишан яз, са декьикьада кисна акъвазунилай гатIунна.
«Арадал атанвай бедбахтвилин дуьшуьшдиз талукь силисдин ахтармишунар кьиле тухудайла, винел акъатзавай са жерге месэлаяр Дагъустан патал «чIулав гьафтедин» асул себебар хьана. Энергетикадин къурулуш мукьвал-мукьвал пайгардикай хкатун, газдилай кIвалера хъиткьинунар арадал атун, АЗС хъиткьинун – вири и крари бязи къуллугъчияр чпин везифайрив намуслувилелди эгечI тийизвайди къалурзава. За садакни тахсир кутазвач. Ихьтин гьалар арадал атун за Дагъустанда хейлин йисара кардик квай тайин къурулуш къайдадикай хкатунихъ галаз алакъалу ийизва», — лагьана С.Меликова, заседание ачухдайла.
Ада гъавурда турвал, ихтилат къанунсуздаказ жуьреба-жуьре объектар эцигдай ихтиярар гуникай, эцигунринни монтаждин кIвалахар кьиле тухудайла, тайин шартIарал амал тавуникай ва маса нукьсанрикай физва.
«Гьайиф хьи, гьам муниципалитетрин, гьамни региондин гьукумдин органри тухузвай гуьзчивал зайиф хьуни жавабдарвал авачир бязи ксари къанунсузвилер авуниз рехъ ачухна. Хсуси мал-девлетдин сан артухарунин къайгъуйрик кваз, гзафбуру пака арадал атун мумкин тир гьаларин гьакъиндай са жуьрединни жавабдарвал гьиссзавач. За гьисабзавайвал, кьилдин ксари ваъ, вири къурулушри хатасузвилин истемишунриз лазим къайдада фикир тагунин нетижада ихьтин мусибатни арадал атана. Шегьре рехъ ава, адаз мукьва АЗС хьтин акьалтIай еке хаталувал авай объект эцигдай ихтияр авачир хатасузвилин зона ава. Арадал атанвай гьалариз дуьзгуьн къимет гуда. Идахъ галаз сад хьиз республикада авай вири АЗС-рал ахтармишунар тешкилда», — къейдна Дагъустандин Кьили.
Агьмед Магьмудов
