Дагъустанди къецепатан уьлквейриз рекье твазвай суьрсетдин кьадар артухарнава
Дагъустандин экспортдиз куьмек гудай центрадин регьбер Руслан Абаскъулиева къейд авурвал, Дагъларин уьлкведа гьасилзавай суьрсет дуьньядин 40 уьлкведиз рекье твазва.
Адан гафаралди, экспортдиз акъудзавай суьрсетдин кьадар йисалай-суз артух жезва. Къецепатан уьлквейриз рекье тунвай суьрсетдин къиметдин кьадар 100 миллион доллардилай алатнава. Къейд ийин хьи, экспортдиз ракъурзавай суьрсетдин жуьрейрин кьадарни артух жезва.
Икьван гагьди Дагъустандин лапагдин як Саудрин Аравиядиз, Ирандиз рекье твазвайтIа, гила и сиягьдик Ирак, Оман, Афгъанистан хьтин уьлквеярни акат хъувунва.
Къейдзавайвал, Дагъустандин як Юкьван Азиядин уьлквейрини маса къачузва. Республикада гьасилзавай лапагдин якIун умуми гьисабдикай экспортдиз 1 процентдилай артух тушиз рекье твазва.
«Лезги газет»
