Квез чидани?

. Шри-Ланка Юкьван Азиядин, мадни дуьздаказ лагьайтIа, Индиядин океанда авай остров-уьлкве я.

. Шри-Ланкадин умуми майдан 65610 квадратный километрдикай ибарат я. Уьл­кведа 22 миллионни 180 агъзурдалай гзаф инсанар яшамиш жезва.

. Санскрит чIалай таржума авурла, “Шри-Ланка” “бахтавар чил” лагьай чIал жезва.

. Шри-Ланкадин гьакъикъи меркез Коломбо ятIани, официальный меркез Шри-Жаяварденепуру-Котте я.

. Шри-Ланка 1948-йисалди Великобританиядин колония тир.

. Шри-Ланкада государстводин дережадин кьве чIал ава – тамильский ва сингальский. Ибурулайни гъейри, островда ингилис чIални машгьур я.

. И уьлкведин агьалийрикай 70 процент буддистар я, 20 процент –  индусар, амай 10 процент – мусурманар, сикхияр ва хашпараяр.

. Вири динрин суваррин йикъар уьл­кведа вирибур патал ял ядайбур яз тес­тикьарнава. Гьавиляй уьлкведа суваррин йикъар гзаф ава. Динрин суваррин йикъа­ра ички маса гунал кIевелай къадагъа ала. Муькуь йикъарани ички квай хъвадай затIар анжах махсусдаказ чара авунвай чкайрай маса гузва.

. Шри-Ланкада туристрин рикI алай машгьур чкайрикай сад Сигирия дагъ я. Адан кукIвал акьахун патал 1001 кIар­цIи­кай ибарат яргъи гурарай хкаж хьана кIанзава.

. Шри-Ланкада мороженое машгьур я. Уьлкведин гьар са пипIе морожнияр гузвайбур гьалтда.

. Гьавадин чими, хъсан шартIар авайвиляй Шри-Ланкада емишарни салан май­ваяр бул я. Бананрин бегьер и уьл­кведа йисан къене ругуд сеферда кIватI хъийизва.

. ТIям хъсанарун патал хуьрекрик кутадай дарчин Шри-Ланкада гзаф машгьур я. Алимрин фикирдалди, дарчиндин ватан Шри-Ланка я.

. Эгер мукъаятвал тавуртIа, Шри-Лан­када туристриз маймунри зиянар гун мумкин я. Чкадин агьалийри маймунар пак гьайванар яз гьисабзава, амма гьайванри бязи вахтара ажугълувал къалурда. Гьави­ляй туристриз дакIарар агалун ва хсуси шейэрал гуьзчивал тухун теклифзава.

. Уьлкведа жуьреба-жуьре гьашаратарни гзаф ава. Гьавиляй махсус кремар ишлемишун чарасуз я. Нянрихъ сейрдиз­ экъечIдайла, гьашаратрикай хуьн патал­ беден михьиз кIевдай парталар ва гъуьлягърикай хуьн патал кIеви чекмеяр алу­кIун чарасуз я.

. Агьалияр филерив хушвилелди эгечI­зава. Фил и уьлкведин ярж я. Фил яна кьейидаз уьмуьрлух дустагъда ацукьарунин жаза гузва.

. Шри-Ланкада хизанар чара жезвай дуьшуьшар лап тIимил ава. Себеб ам я хьи, гъуьлни паб чара хьайидалай кьулухъ итимди вичин мажибдин 50 процент вири уьмуьрда виликан папаз гана кIанзава.

. Шри-Ланкада агьалийрин 92 процент савадлу я.

. И уьлкведа кIвалахзавай вири дишегьлияр милли партал (сари) алукIуниз мажбур я.

. Чай гьасилунал гьалтайла, Шри-Лан­кади дуьньяда пуд лагьай чка кьазва. Сад ва кьвед лагьай чкайрал Индия­ни Китай ала. Цейлондин машгьур чай лагьайтIа, Шри-Ланкада арадал гъизва.

. Шри-Ланкада яцIу инсанар саки авач.

. Чкадин пул (Шри-Ланкадин рупия) уьл­кведай къецепатаз акъудунал къада­гъа ала.

. Шри-Ланка маса уьлквейриз къимет­лу къванер ракъурзавайбурукай я. Ина сапфир, зумруд ва я  якъут ужуз къиметдай маса къачуз жеда.

«Лезги газет»