Алай вахтунда Белоруссияда кьиле физвай СНГ-дин уьлквейрин II Къугъунра чи ватанэгьли Анвар Аллагьярова (60 кг-дин заланвал авайбурун арада) грекринни римлуйрин жуьреда кьуршахар кьунай къизилдин медаль къазанмишна.
Тамам 10 юкъуз (4-августдилай 14-августдалди) Белоруссиядин 10 шегьерда, гьа гьисабдай яз Минскда, Брестда, Витебскда, Гомелда, Гроднода, Солигорскда, кьиле фидай и акъажунра дуьньядин 22 (Белоруссия, Россия, Узбекистан, Азербайжан, Египет, Иран, Ливан, ОАЭ, Пакистан, Монголия, Къазахстан ва мсб) уьлкведай тир 2 агъзурдалай виниз спортсменри чпин устадвал къалурда. Россиядин хкянавай (ам 408 спортсмендикай ибарат я) чIехи командади ана агалкьунралди иштиракзава. Са шумуд юкъуз къазанмишнавай медалрин, гьакI абурукай къизилдинбурун кьадардал гьалтайла, чи уьлкведин командади 1-чка кьазва (иесийрин команда 2-чкадал ала).
ИкI, 5-августдиз Солигорск шегьерда грекринни римлуйрин жуьреда кьуршахар кьунай акъажунра дуьньядин 9 уьлкведай тир спортсменри гьасиррал чпин устадвал къалурна. Россиядин хкянавай командади спортдин и жуьредай заланвилин 8 категорияда къизилдин медалар къазанмишна. Абурукай сад, винидихъ къейднавайвал, — Анвар Аллагьярова. Финалдиз акъатдалди ада кьиле тухвай 3 бягьсни вахт амаз гъалибвилер къазанмишуналди акьалтIарна. Финалда чи ватанэгьли Азербайжандай тир Мугьаммад Шукурзадедихъ галаз бягьсиниз экъечIна, инанмишвилелди гъалибвал къазанмишна.
РикIел хкин: вичин ери-бине Ахцегьай тир А.Аллагьяров акъажунриз Москвадин областдин патай экъечIзава. Ам Россиядин, Европадин ва 23 йисал къведалди яшда авайбурун арада дуьньядин чемпион ва хейлин акъажунринни международный турниррин гъалибчи я. Алай вахтунда чи ватанэгьли Великие Луки шегьерда физкультурадин ва спортдин госакадемиядин (ВЛГАФК) студент я.
Рагнеда Рамалданова
