Са шумуд югъ идалай вилик СтIал Сулейманан райондин Испика меценат Багъиш Ризаевахъ галаз гуьруьш кьиле фена. Вичин хсуси такьатрин гьисабдай хайи хуьре волейболдин майдан туькIуьрай ватанэгьлидихъ галаз гуьруьшда райондин администрациядин кьилин сад лагьай заместитель Лацис Оружева, Испикрин СП-дин кьил Рагиф Агьмедова, райадминистрациядин спортдин, туризмдин ва жегьилрин крарин рекьяй комитетдин директор Чингиз Абдулмежидова ва хуьруьнвийри иштиракна.

Л.Оружева хайи хуьр аваданлу авунин кардик вичин лайихлу пай кутунай Багъиш Ризаеваз рикIин сидкьидай сагърай лагьана, райондин кьилин тIвар кхьенвай сят ва «Арифдаррин ва шаиррин макан» тIвар алаз райондикай кхьенвай ктаб багъишна. Рагиф Агьмедова вири хуьрерин агьалийрин тIварунихъай меценатдиз сагърай лагьана. Ватанэгьлидин тIварунихъ чими келимаяр лагьайбурун арада Чингиз Абдулмежидовни авай.

РикIел хкин: 2020-йисуз Б.Ризаеван финансрин такьатрихъ Испика кьве куьчеда къир цана. Меценат хайи хуьр аваданлу авунин крара инлай кьулухъни иштиракиз гьазур я. Гележегдин планрик мини-футболдин майдан туькIуьрун ква.

Гуьруьшдал малум хьайивал, меценатди туькIуьрнавай волейболдин майдан ачухуниз талукьарнавай шад мярекат, спортдин и жуьре арадал атана 100 йис тамам хьуниз талукьарна, и мукьвара кьиле тухун пландик ква.

Чи мухбир