Алатай гьафтеда Мегьарамдхуьруьн районда Россиядин гьавадин десантдин кьушунрин (ВДВ) югъ шад гьалара къейдна. Лугьун лазим я хьи, десантникрин югъ сувар хьиз кьиле тухун ина фадлай адетдиз элкъвенва. Кьиблепатан Дагъустандин амай районра и югъ къейд авуникай чаз малуматар авач. Амма ашкара кар масад я: Мегьарамдхуьруьн райондин кьил Фарид Агьмедова ВДВ-да къуллугъна. Лугьурвал, виликан десантникар жедайди туш.
РикIел хкин: 1930-йисан 2-август ВДВ арадал атай югъ яз гьисабзава. И юкъуз Москвадин военный округдин гьавадин дяведин къуватрикай (ВВС) Воронеждин патарив 12 касди (десантрин подразделение) сад лагьай сеферда яз парашютар гваз самолетдай хкадарнай. 2006-йисан 31-мартдиз РФ-дин Президентдин Указдалди 2-август ВДВ-дин югъ яз тайинарнава. Россиядин десантникрал цавун ранг алай беретар ала. ВДВ-дин девиз — «Чалай гъейри, садни!» («Никто, кроме нас»).
Адет хьанвайвал, суварин юкъуз десантникар райадминистрациядин дараматда кIватI хьана. Абуру виликан десантникар жедайди туш лугьудай фикир мад сеферда субутна. Къейд авун лазим я хьи, гьар йисуз Мегьарамдхуьре неинки и райондин, Дагъустандин, гьакIни Россиядин шегьеррай тир десантникарни кIватI жезва.
Фарид Агьмедова, кIватI хьанвайбурухъ элкъвена, вири десантникриз пешекар сувар тебрикна, абурухъ чандин мягькем сагъвал, кьилел ислягь цав, «лувар квай пехотада» алай вахтунда къуллугъзавайбурухъ — Украинада кьиле физвай военный махсус серенжемда Ватандин итижар хуьзвайбурухъ — агалкьунар хьун алхишна. Ада гьакIни РФ-дин ВДВ-дин кьиле авай ксарин, кьилди къачуртIа, ВДВ-дин командующийдин заместитель, генерал-майор Арсен Рагьманован тIварунихъай тебрикдин чими келимаяр агакьарна.
Шад мярекатдин сергьятра аваз са шумуд касдив райондин кьилин тIварунихъай, СВО-дин иштиракчийрин тереф хуьн яз, ВДВ-дин ветеранри кьиле тухузвай кIвалахда активнидаказ иштиракунай, жегьилар ватанпересвилин руьгьдаллаз тербияламишунай чухсагъулдин чарар, гьакIни Дагъустандин ва Россиядин десантникрин союзрин медалар ва орденар вахкана. Фарид Агьмедова ветеранрин-десантникрин кIвалах къиметлуди тирди къейдна, гьикI хьи, абуру акьалтзавай несил ватанпересвилин руьгьдаллаз тербияламишунин карда активвал къалурзава.
Гуьгъуьнлай кIватI хьанвайбурун тIварарихъ тебрикдин хуш келимаяр Кьиблепатан Дагъустандин десантникрин Союздин председатель Мурад Керимова, Къуюстанрин хуьруьн кьили ва масабуруни лагьана.
Суварин мярекат Россиядин ВДВ-дин пайдахар алай машинри цIиргъина аваз Мегьарамдхуьруьн райондилай цIар илитIуналди акьалтIна.
Рагнеда Рамалданова
