И мукьвара Ахцегь райондин Хинерин хуьре госпрограммадин («Формирование комфортной городской среды») сергьятра аваз туькIуьрнавай ял ядай ва машгъулардай чка ачухуниз талукьарнавай шад мярекат кьиле фена. Ана райондин кьил Абдул-Керим Палчаева, образованидин управленидин регьбер Халидин Эльдарова, хуьруьн администрациядин кьиле авай ксари ва общественностдин векилри иштиракна.
Лишанлу вакъиа тебрикдайла, А.Палчаева хуьруьн агьалийриз уьмуьрда активвиляй ва ватанпересвиляй чухсагъул лагьана. Ада хиневияр гьамиша мягькем руьгьдалди ва ватанпересвилелди тафаватлу хьайиди, Советрин Союздин Игит Гьасрет Алиева ва кьуршахар кьунай пагьливан, СССР-дин чемпионатрин призёр Къурбан Агъаева и ерияр субутзавайди, абур чкадин агьалийрин руьгь хкажзавай дирибашвилин ва жуьрэтлувилин чешнеяр тирди къейдна.
Шад мярекатдал хуьруьн кьил Зилфери Нуралиева абадвал патал кьиле тухузвай активный кIвалах ва чалишмишвилер къейдна. Хуьруьн уьмуьрда лишанлу вакъиа лагьайтIа, гьам райондин кьиле авай ксарин, гьамни кьакьан дагъдин гьар са агьалидин къуватар санал кIватIуналди арадал атайдал фикир желбна.
КIватI хьанвайбурухъ элкъвена рахай агъсакъал Гуьлали Нуралиева ва Хинерин медениятдин ирс хуьнин рекьяй фондунин директор Видади Агъасиева хуьруьнвийрин общественный уьмуьрда и вакъиадихъ еке метлеб авайдакай лагьана.
— Са шумуд йис идалай вилик дагъдин яргъал тир хуьре кьетIен жуьредин ва алай аямдин истемишунриз жаваб гуз жедай гуьрчег ихьтин пIипI арадал къведа лагьана гьич фикирдизни гъиз жедачир. Инанмишвилелди лугьуз жеда хьи, и агалкьуни санлай жемият ва хуьр вилик тухунин крара цIийи кам къачун лишанламишзава, — къейдна абуру.
Дагъустандин дагъдин хуьре ял ядай ва машгъулардай чка ачухун чкадин агьалияр патал лишанлу вакъиадиз элкъвена. Ида республикадин гъвечIибур тир ва яргъа, дагъда, авай районрин хуьрерани хъсан патахъ дегишвилер арадал атун мумкин тирди субутзава.
Чи мухбир
