СтIал Сулейманан районда машинрин «Курхуьр-КIварчагъ-Cиртич» рекьин 3-километрдилай 12-километрдал кьван мензилда бинедилай ремонт авунин кIвалахар кьиле тухузва.
КIвалахрин заказчик РД-дин «Дагестанавтодор» ГКУ-дин автомашинрин рекьерин Управление я. Объектдал пудратдин ООО «Ботлихагропромдорстрой» карханадин пешекарри кIвалахзава. КIвалахдин къимет 363 миллион манатдиз барабар я. Алай вахтунда ина чил дуьзарунин ва къир цун патал гьазурунин кIвалахар акьалтIарзава, ятар масанихъ акъуддай турбаяр тайинарзава.
Идалай гуьгъуьниз, проектда къалурнавайвал, Экендиль ва НуьцIуьгъ хуьрерин мулкарал кIвалахар башламишда. Анра, ремонтдилай кьулухъ инсанар къекъведай тротуарар ва абурун жугъунар туькIуьрда, рекьера эквер твада. Алай йисуз НуьцIуьгърин хуьряй Зизикдал кьван рехъ, муьгъни галаз, бинедилай ремонтда. КIварчагъ, Зизик, НуьцIуьгъ ва Экендиль хуьрери, гьакIни СтIал Сулейманан райондин администрацияди, муракабди тир и участокда рехъ ремонт авун патал 2012-йисалай арзаяр рекье твазвай. Иллаки зулухъай ва хъуьтIуьз райцентрадив агакьарун саки мумкин кар тушир. Рекьин и пай гьатта махсус техника паталдини муракабди тир. Лазим дуьшуьшра инсанар, Сиртичдай яна, федеральный шегьредиз экъечIуниз ва 50 километрдилай артух рекьяй элкъвена финиз мажбур жезвай. Гила лагьайтIа, рехъ кьве сеферда куьруь ва авайдалай са шумуд сеферда хъсан, ерилу жезва.
Игит Марат Мугъулович Гьажибалаеван ватан тир Зизикиз фидай рехъ ремонт авунин кIвалахар лап куьруь вахтунда акьалтIарна. Идалди игитвилелди телеф хьайи полковникдин бубади республикадин Кьил Сергей Меликовавай авур тIалабун кьилиз акъуднава. Хцин тIварцIиз гьуьрмет авунин лишан яз, ада хайи хуьруьз рехъ туькIуьрун, мектебни аялрин бахча эцигун ва цин турба гъун тIалабнай. Рехъ туькIуьрна, ада хуьруьнвийрин ва райондин агьалийрин рикIер шадарнава. Амай месэлайрикай рахайтIа, СтIал Сулейманан райондин администрация объектар эцигдай чилин документар гьазурунал машгъул я. И объектар эцигуниз талукь проектар туькIуьрдайвал тапшуругъар гьазурнава ва материалар талукь тир министерствойриз рекье тунва.
Жасмина Саидова
