Гату хуьруьн майишатдин карханайрин, лежбервилинни фермервилин майишатрин ва арендаторрин къайгъуяр артухарнава. СтIал Сулейманан райондин АПК-дин хиле 20 агъзурдалай виниз кьилдин ксарин куьмекчи майишатри ва 960 арендаторди зегьмет чIугвазва. Абуру районда хуьруьн майишат вилик тухуник кутазвай пай екеди я. Арендаторар тир Надир Къадимовакай (ДаркIуш-Къазмаяр) ва Сеферали Сефикъулиевакай (Агъа СтIалар) суьгьбет ийиз кIанзава.
Райондин хуьруьн майишатдин ва суьрсетдин управленидин начальник Къазиагьмед Къазиагьмедовахъ ва адан заместитель Къазиагьмед Абумислимовахъ галаз чун сифтедай ДаркIуш-Къазмайрилай тир арендатор, халияр гьасилунал машгъул тир Надир Къадимован бахчадиз фена. Гегьенш сал, ана агакьнавай халийрин бегьер акурла, гуьгьуьлар шад жезва.
ЦIи Надир Къадимова 20 гектарда халияр цанва. Сала яд стIал-стIал гудай къурулуш кардик ква.
Арендаторди чаз лагьайвал, ада гьар йисуз гектардай 65-70 тонндив агакьна халияр кIватI хъийизва. Икьван чIавалди 45 тонн халияр муьштерийрал агакьарнава.
— Халияр маса гунин патахъайни четинвилер авач. Чаз гьар йисуз райондин хуьруьн майишатдин ва суьрсетдин управлениди Кьасумхуьрел, ЦIийи Макьарал, ДаркIуш-Къазмайрин къекъуьндал халияр маса гудай чкаяр чара ийизва, — лугьузва Надир Къадимова. – Идалайни гъейри, салаз атана, халияр маса къачузвай инсанрин, тешкилатрин кьадарни тIимил туш.
КIватIна, эхирдай сала амукьай халияр ада гьар йисуз хуьруьнвийриз, атай маса инсанриз пулсуздаказ гузва, суваб патал.
* * *
Къ.Къазиагьмедовахъ ва адан заместитель Къ. Абумислимовахъ галаз чун Агъа СтIалрин хуьряй тир арендатор Сеферали Сефикъулиеван багъдизни фена. Са шумуд кас рабочиярни галаз арендатор мичIи вили рангунин, «кабардинка» сортунин ири хутар атIунал машгъул тир.
Муьштерийрин патай еке игьтияж авай и хутарин багълар С. Сефикъулиевахъ 3 гектарда ава. Чаз акурвал, тарарал хутарин бул бегьер дигмиш хьанва. Еридиз, акунриз хъсанбур я.
Патав шефтелрин багъ гва. Ана са шумуд сортунин шефтелар ава. Фад агакьдайбур атIуз, рабочийри къайдадик кваз ящикра твазвай. Акунризни, дадунизни хъсан шефтелар тирдахъ чун инанмиш хьана.
Малум хьайивал, Сеферали Сефикъулиев багъманчивилел машгъул жез 10 йис я. Алай вахтунда адан кIвачихъ хутун, шефтелрин, пIинидин, ичин, чуьхверрин ва шуьмягърин 20 гектар багълар гала. Икьван чIавалди арендаторди 20 тонндилай виниз хутар, шефтелар, чуьхверар кIватIнава.
Санлай къачурла, алай йисуз арендатордихъ 45-50 тонндилай тIимил тушиз емишар кIватI хъийидай фикир ава.
— ЦIинин йисуз марфар гзаф къвана. И кар себеб яз, пIинияр ктIана, абур кIватIиз хьанач, — лугьузва С. Сефикъулиева. – Шаз пIинийрилай хъсан къазанжи хьайиди тир.
С. Сефикъулиева чаз лагьайвал, емишар ада чи райондин къенепатани маса гузва. Асул гьисабдай емишар виликамаз кутIуннавай икьраррин бинедаллаз республикадин ва Россиядин шегьерриз рекье твазва.
Багъда цанвай вири къелемар арендаторди вичи гьасилна. С. Сефикъулиев, цилер цана, къелемар гьасилдай, абуруз тIур гудай устадни я.
— Надир Къадимов ва Сеферали Сефикъулиев хьтин инсанри, суьрсет гьасилуналди, халкьдин суфра берекатлу ийизва, — лугьузва Къазиагьмед Къазиагьмедова. – Намуслу зегьметдай абуруз чухсагъул, аферин.
Хазран Кьасумов
