Дагъустандин Яшайишдин фондуни хабар гузвайвал, гьар вацран 3 (число) аялрин пособияр рекье твазвай сад тир югъ я. Эхиримжи йикъара Дагъустандин Яша­йиш­дин фондунин «ифей линиядиз» аялрин пособияр агакь тавуниз талукь гзаф зенгер къвезва.

Идарадин малуматда къейднавайвал, аялрин пособияр абурун диде-бубайрин картайриз гьар вацра са юкъуз, яни 3-числодиз, къвезва. ИкI, гьар вацра и юкъуз рекье твазвай пуларик ква:

— 17 йисал къведалди яшара авай аялриз гузвай сад тир пособие ва кIвачел залан тир дишегьлийрин «декретнияр»;

— кIвалахдик квачир диде-бубайриз са йисни зурал къведалди аялдиз гузвай пособие;

— хизанда сад лагьай аял хунихъ галаз алакъалу яз 3 йисалди гузвай пособие;

— армиядин жергейра къуллугъзавай аскердин аялдиз гузвай пособие;

— 8 йисалай 17 йисалди яшара авай аялриз гузвай пособие (эгер ам виликамаз тайинарнаватIа).

Чешмеди мадни кьетIендаказ фикир желбзавайвал, эгер пул пакамахъ атун та­вуртIа, ам няналди, гьикI хьайитIани, агакьда. Диде-бубади пулдин и такьатар Россиядин Почтади агакьарунин къайда хкя­на­ватIа, ам квев гьар вацран 3-22-йикъара почтадин тайин тир отделенидин кIвалахдин графикдин бинедаллаз вахкуда.

Мукъаят хьухь!

Эгер квез Дагъустандин Яшайишдин фон­дунай зенгна, чеб идарадин къуллугъчияр я лагьана, квевай са гьихьтин­ ятIани делилар лугьун (телефондай) тIа­лабзаватIа, гу­мир. Кьиле чIуру ниятар авайбур куь пул къакъудун патал цIийи къайдайрихъ къекъвезвайди рикIелай ракъурмир! 

Фондунин пешекарри СНИЛС, паспортдин делилар, банкдин картадин нумра, адан Пин-код ва я личный кабинетдин пароль гьич садрани тIалабзавайди туш. Эгер квез зенгнавайбуру и делилар тIалабзаватIа, абур лутуяр хьун мумкин я.

ЧIехи пай ихьтин вахтара лутуйри, «пенсиядал пул алава хъувун», «къуллугъар тайи­нарун» ва «гузвай пулар цIийи кьилелай гьахъ-гьисаб хъувун» патал ва икI мад делилар лазим  я лугьуналди, чпин чIуру ниятар кьилиз акъудзава. Бязи вахтара пул рекье тун патал делилра аваз хьун мумкин тир гъалатIар туькIуьр хъувун лазим я лугьу­налди, инсанрин, иллаки яшлубурун кьил элкъуьрзава. Гьаниз килигна, Дагъустандин Яша­­йишдин фондуни шак физвай зенгиниз яб тагун, эгер, зенгнавай касди винидихъ къейднавай делилар тIалабиз хьайитIа, зенг гьасятда атIун теклифзава.

Мадни фикир желб ийиз кIанзавай кар ам я хьи, лутуйри, кIвалериз атана, квевай делилар «тестикьарун» тIалабунни мумкин я. Гзаф вахтара «квез пенсия хкажнава, амма делилар тамамбур туш» лугьуникай багьна кьазва. Гьаниз килигна, мукъаятвал квадарна кIандач. Эгер куьн ихьтин дуьшуьшдал расалмиш хьайитIа, гьич са жуьредин делиларни квекай гумир.

Дугъриданни, РФ-дин законодательст­во­да­­­­ пенсияр артухарун къалурнава. Амма и кар кьилиз акъудун патал пенсийрин идарадин­ къуллугъчияр куь кьилив кIвалериз къведайди туш. Дегишвилерикай вири малуматар­ СФР-дин­ официальный каналрани соцсетра ва я адан официальный сайтда (sfr.gov.ru.) чапзава­.

РикIел хкин: Дагъустандин Яшайишдин­ фондуни вири къуллугъар, гьа виликдай хьиз, муьштерийрихъ галаз кIвалахдай къуллугъра ва «Госкъуллугъар» порталдин куьмекдалди, кьилинди, пулсуздаказ кьилиз акъуд­зава. Пулдин такьатар арза гайила ва я чеб чпелай (автоматически), фондунихъ авай виликан де­лилрин бинедаллаз тайинарзава.

Рагнеда Рамалданова