СтIал Сулейманан райондин администрацияда и мукьвара ММА-дай (женгинин единоборствояр) ва грэпплингдай кьиле фейи дуьньядин Кубокда ва Вирироссиядин акъажунра хъсан нетижаяр къазанмишнавай жаван спортсменар ва абурун тренерар-насигьатчияр шад гьалара кьабулна, абурув чухсагъулдин чарар вахкана. Идакай чаз райадминистрациядин пресс-къуллугъди хабар гана.
Райондин кьил Саид Темирханова, агалкьунар тебрик авуналди, чухсагъулдин чарар вахкайбурун жергеда дзюдодайни самбодай тренерар-насигьатчияр — Камиль Абдурагьманов (3-нумрадин ДЮСШ-дин) ва Буба Бабаев (1-нумрадин ДЮСШ), женгинин единоборствойрай дуьньядин Кубок патал акъажунра чемпионвилин тIварар къазанмишай Сулейман Кадиев (ММА-дай Вирироссиядин акъажунрин гъалибчи), Амрид Эседов (ММА-дай республикадин акъажунрин гъалибчи ва призёр), Селим Шихнабиев (ММА-дай акъажунрин гъалибчи) ва Имам Юсупов (грэпплингдай акъажунрин гъалибчи), гьакIни грэпплингдай дуьньядин Кубок патал акъажунра гимишдин медалдиз лайихлу хьайи Саид Шихнабиев ава.
РикIел хкин: алатай вацра Краснодардин крайдин Лермонтово хуьре женгинин единоборствойрай дуьньядин Кубок патал акъажунра чи спортсменри хъсан нетижаяр къазанмишна.
Тренеррихъ ва спортсменрихъ галаз кьиле фейи гуьруьшдал С.Темирханова къазанмишнавай агалкьунар тебрик авунихъ галаз сад хьиз, абуруз спортдин культура вилик тухуник лайихлу пай кутунай сагърай лагьана, гележегда абуру мадни еке гъалибвилер къазанмишуник умудар кутунвайди къейдна.
— Куьне район спортда виниз тир агалкьунар къазанмишуналди машгьурун давамарзава. Спорт вилик тухун, сагълам уьмуьр пропаганда авун, руьгьдиз мягькем сагълам инсанрин несил тербияламишун чна сифте нубатда фикир гузвай месэлайрик акатзава. Куь агалкьунрал чна дамахзава, жегьилрин арада спорт машгьур авунай квелай разивалзава. Спортда къазанмишнавай агалкьунар мад сеферда тебрикзава. Умудлу я, инлай кьулухъни квехъ виниз тир нетижаяр жеда. Квехъ чандин сагъвал, мадни чIехи гъалибвилер хьурай! — алхишна райондин кьили.
Гуьруьшдал тебрикдин чими келимаяр райадминистрациядин спортдин, туризмдин ва жегьилрин крарин рекьяй комитетдин директор Чингиз Абдулмежидова ва умуми отделдин начальник Тельман Муталибова лагьана.
Чпин нубатдай яз, спортсменри ва абурун тренерри муниципалитетдин кьиле авай ксариз районда жегьилар спортдал машгъул жедай къулай шартIар тешкилунай ва спортдин серенжемар кьиле тухунай сагърай лагьана, чпин гележегдин планар ва районда спорт вилик тухуниз талукь фикирар раижна. ИкI, 1-нумрадин ДЮСШ-дин тренер-насигьатчи Б.Бабаева ДЮСШ-да жаванрихъ галаз тренировкаяр тухузвай зал ремонт авунин месэла къарагъарна. С.Темирханова тренердин тIалабун кьилиз акъудун хиве кьуна. Залда ремонтдин кIвалахар кьиле тухун патал адан тапшуругъдалди пулдин такьатар чара авуна.
Регина Семедова
