И йикъара Иорданиядин меркез Амман шегьерда азаддаказ кьуршахар кьунай 20 йисал къведалди яшара авай жегьилрин арада кьиле фейи Азиядин чемпионатда чи ватанэгьли, Къазахстандин хкянавай командадик кваз экъечIнавай Камил Куругълиев (шикилда – вичин бубадихъ галаз) 97 кг-дал къведалди заланвал авайбурун арада къизилдин медалдиз лайихлу хьана.
Финалдиз акъатдалди Ирандай (5:4), Индиядай (11:0) тир спортсменар ва финалдани Айназар Базарбаев (Узбекистан) адаз 5:1 гьисабдалди кумукьна.
Камил Куругълиеван ери-бине Хив райондин Цналдилай я. Ада кьуршахар кьунай пагьливанрин рехъ давамарзава. Къазахстандин Актау шегьерда буба Мегьамед Куругълиеван ва тренер Роман Агьметханован гъилик вичин устадвал хкажзавай жегьил чи машгьур спортсмен, алай вахтунда Грециядин патай экъечIзавай Даурен Куругълиеван имидин хва я. Камилан буба Мегьамед Куругълиев Къазахстан республикадин лайихлу тренер, дуьньядин чемпионатдин буьруьнждин призёр (2005-йис) ва хейлин маса турниррин гъалибчи я.
РикIел хкин: им чи ватанэгьлидин сад лагьай чIехи агалкьун туш. Кьилди къачуртIа, алатай йисуз Камил Куругълиева (92 кг-дал къведалди заланвал авайбурун арада) 17 йисал къведалди яшара авай жегьилрин арада Италиядин меркез Рим шегьерда кьиле фейи чемпионатда къизилдин медаль къазанмишна. Финалда адаз Венгриядай тир М.Арсункаев 11:0 гьисабдалди кумукьна. Азиядин чемпионвилин тIвар ада алатай йисузни къазанмишна. 2021-йисуз Венгриядин меркез Будапешт шегьерда жегьилрин арада кьиле фейи дуьньядин чемпионатда ам буьруьнждин медалдиз лайихлу хьана.
Чи мухбир
