ЦIи лезгийрин машгьур шаир Пакизат Бейдуллаевна Фатуллаевадин (Гьуьсейновадин) 75 йис тамам жезва. Аллагьди и дагъви дишегьлидиз захавилелди жуьреба-жуьре рекьерай алакьунар ганва: ам бажарагълу шаир, публицист, кьетIенвал авай таржумачи, лап хъсан пешекар-журналист я. Адан къелемдикай шииратдин жуьреба-жуьре жан­райра, кIалубра аваз кхьенвай више­ралди эсерар хкатнава, ам са шумуд ктабдин автор я. Абурун арада «Бубуйрин чуьл», «Зи экуь кIвал», «Ишара­яр», «Гад гьарай» ва масабур ава. П.Фатуллаевади къелемдин юлдаш­рин цIийи ктабриз дериндай къимет гузва, газетра, журналра метлеблу, гьар жуьредин месэлаяр гьялзавай макъалаяр, рецензияр чапзава. Таржумачивилин кIва­лахни зайифарзавач.

ДГУ-дин филологиядин факультет­ акьалтIарайдалай кьулухъ П.Фатуллае­ва­ди Москвада, М.Горькийдин тIва­ру­нихъ галай литинститутда, кIелун давамарна. Ана кIелай йисара ада вичин шаирвилин дережа мадни виниз хкажна, устадвал артухарна.

Дагъустандин медениятдин лайихлу къуллугъчи Пакизат Бейдуллаевнади лезги чIалал акъатзавай «Дагъустандин дишегьли» журналдин редакторвиле яргъал йисара кIвалахна. ЧIалан, гафунин устад яз, шаирди хайи лезги чIал хуьниз, вилик тухуниз асул фикир гузва. И рекье чIугвазвай зегьмет РД-дин журналистрин Союзди адаз «Дидед чIал хуьнай ва дурумлу авунай» премия гуналди къейдна.

Вичин яратмишунра шаирди инсандинни ам яшамиш жезвай чилин алакъайрикай, хайи Ватандикай ва, гьелбетда, муьгьуьббатдикай веревирдер ийизва. «Зи экуь кIвал» ктабда ада эдебдин, ахлакьдин багьавал ва акьван чаз герек тир девлетрин тарифзава, абур вини дережада хуьзва.

Эхиримжи йисара шаирди аялар па­тал теснифзава, кьилдин ктабарни акъуд­нава. Абурун жергедай яз, «Пси-пси псайди», «Кьуьлиз кIанда Адамаз»­, «Лезги гьарфар» ва маса ктабрин тIва­рар кьаз жеда.

Мукьвара Дагъустандин Р. Гьамзатован тIварунихъ галай милли ктабханадин край чирдай ва милли литературадин отделда П.Фатуллаевадин яратмишунрин алемдиз талукьарнавай «Заз кьилдин бахт кIандач» тIвар алай ктабрин выс­тавка гьазурнава. Ктабрилай гъейри, ана шаирди жуьреба-жуьре йисара эдебиятдин месэлайрай кхьей макъалаяр чапнавай газетарни, журналарни эцигнава. П.Фатуллаевадин хизандин альбомдай ва отделдин фондунай къачунвай шикилрини автордин цIийиз акъатнавай «Гад гьарай» ктабди иллаки чпел фикир желбзава.

Выставкадин кьилдин паюна кIелза­вайбуруз шаирдин эсерар гьатнавай­ антологийрихъ, хрестоматийрихъ, энци­кло­­педийрихъ галаз таниш жедай, анрай кьилдин чирвилер къачудай мумкинвални ава. Муькуь пай юбилярдин­ уьмуьрдиз ва яратмишунриз талу­кьар­нава. Анай П.Фатуллаевадикай Гь.Къур­бана, Аб.Магьмудова, Ф.Алие­ва­ди, М.Жа­ли­ло­ва, А.Къардаша, К.Ферза­лиева кхьенвай макъалаяр аквада.

Секинат Мусаева