22 ва 23-июлдиз Санкт-Петербургда грэпплинг ва грэпплинг ги жуьрейрай Россиядин чемпионат кьиле фена. Ана чи уьлкведин жуьреба-жуьре регионрай тир виридалайни викIегь спортсменри (итимри заланвилин 8 категориядай, дишегьлийри заланвилин 5 категориядай) чпин устадвал къалурна. ИкI, чи машгьур спортсменар тир Гьабиб Атлуев 62 кг-дал къведалди заланвал авайбурун арада Россиядин чемпионвилин тIварцIиз лайихлу хьана, Артур Агъаширинова (66 кг-дин заланвал авайбурун арада) буьруьнждин медаль къазанмишна.
Къейд авун лазим я хьи, уьлкведин чемпионатда гъалибвилер къазанмишнавай ватанэгьлийрихъ виликан йисарани спортдин маса жуьрейрайни агалкьунар ава. Кьилди къачуртIа, Каспийскда грэпплингдай Дагъустандин чемпионатда 1-чкадиз лайихлу хьайи Гь.Атлуева Чечнядин Шали шегьерда кьиле фейи СКФО-дин чемпионатда грэпплинг ва грэпплинг ги жуьрейрай (кимоно алаз ва кимоно алачиз) къизилдин медалар къазанмишнай.
Артур Агъаширинова лагьайтIа, Арабрин Сад хьанвай Эмиратрин меркез Абу-Даби шегьерда жаванрин арада дуьньядин кIвенкIвечивал патал джиу-джитсудай кьиле фейи акъажунра 46 кг-дин заланвал авай спортсменрин арада 1-чка кьуна ва икI мад.
Чи мухбир
