2023-йисуз вузрин бюджетдин гьисабдай тир чкайрик 590 агъзурдалай гзаф абитуриентривай экечIиз жеда. И кьадардин 73 процентдилай гзаф чкаяр уьлкведин регионрин вузриз пайнава. Бюджетдин чкайрин кьадардал гьалтайла, виридалайни вилик жергейра инженервилин ва технический хилер, педагогикадин илимар, жемиятдин ва медицинадин рекьер ава.
Виридалайни гзаф чкаяр бакалавриатдин программайриз чара авунва — 334 агъзурдалай гзаф. Магистратурадиз — 123,5 агъзур ва специалитетдиз 84 агъзур чка ганва. Бюджетдин бинедаллаз ординатурадик алай йисуз 19,6 агъзур касдивай ва аспирантурадик 17,8 агъзур касдивай экечIиз жеда.
Къейд ийин, вузриз кьабулдай ксарин кьадар тайинарунин график туькIуьрдай къайдани дегиш жезва. РикIел хкин, икьван чIавалди образованидин министерстводи и кар са йисан запас фикирда кьуна ийизвай: икI, кIелунин 2023-2024-йис патал бюджетдин чкаяр гьеле 2022-йисан гатфарихъ тайинарнай. Гила и рекъем кьабулунин кампания тухузвай вахтунда тайинардайвал я. Месела, кIелунин 2024-2025-йис патал бюджетдин чкаяр 2024-йисан январь-февраль варцара пайда. Министерстводи гъавурда твазвайвал, виликдай авай системадивай датIана дегиш жезвай гьалариз талукь жаваб тади гьалда гуз ва уьлкведин экономикада лазим жезвай пешекаррин игьтияжар таъминариз жезвачир.
Жасмина Саидова
