Йисан вири вахтар хъсанбур я. Гад лагьайтIа, мектебра кIелзавай аялар патал хъсандини я, менфятлудини. Гьич тахьайтIа, СтIал Сулейманан райондин Кьулан СтIалрин Радим Халикьован тIварунихъ галай, Эминхуьруьн Абдул Саидован тIварунихъ галай ва вичиз «дагъда авай шегьер» лугьузвай Цмуррин юкьван школайра цIинин каникулрин вахтунда ачухнавай гатун лагерра авай аялар захъ галаз рази жеда. И кардихъ зун анриз фейила ва аялрихъ галаз ихтилатар авурла, инанмиш хьана.
Кьулан СтIалрин юкьван школада ачухнавай лагердиз кутугай «Чубарук» тIвар ганва. Сад лагьай сменада ана 100 аялди ял яна.
Алай вахтунда, 2-сменада, 100 аял ава: 1-7-классра кIелзавайбур. Абур 4 дестедиз пайнава, гьар садахъ вичин тIвар ава: «Солнышко», «Радуга», «Ромашка» ва «Звездочка». Группайрихъ галаз тербиячияр тир Заира Пирметовади, Алина Абдулвагьидовади, Эльмира Наврузбеговади ва Светлана Къемберовади кIвалахзава.
«Чубарук» лагердин руководителдин везифаяр муаллимвилин пешедал ва аялрал рикI алай, вичиз школадин коллективда еке гьуьрмет авай Гуьлмира Сирхаевади кьилиз акъудзава.
Лагерда школьникриз ял ядай, гьар жуьредин мярекатар кьиле тухудай вири жуьредин къулай шартIар яратмишнава. Ана экуь, михьи я. Школадихъ гегьенш гьаят, гуьрчег багъ гала.
Тербиячи Заира Пирметовади чаз лагьайвал, аялар лагерда пакаман сятдин 8-далай йикъан 3-далди жезва. Гьар са югъ пакаман кьезил гимнастикадилай (зарядкадилай) башламиш жезва. Сятдин 9-даз — пакаман, цIикьведаз нисинин тIуьн гузва.
Кьве ашпазди чпин кьве куьмекчини галаз гьазурзавай чими тIямлу хуьрекар аялри иштягьдивди незва. Емишар, гьар жуьре мижеяр, ширинлухарни гузва.
Лагердин руководителди ва тербиячийри аялрихъ галаз зигьин, кьатIунар артухардай серенжемар, шикилар чIугунай мастер-классар, викторинаяр, гьар жуьре къугъунар, культурадинни машгъулатрин мярекатар тухузва. Экскурсийри и жигьетдай кьетIен чка кьазва. ИкI, тербиячи Заира Пирметовади чаз лагьайвал, лагерда авай аялар, яшариз килигна, кьилди-кьилди дестейриз пай хьана, Алкьвадар Гьасан эфендидин, Россиядин Игит Радим Халикьован, СтIал Сулейманан музейриз, МЧС-дин районда авай идарадиз, Кпул-ятар участокда авай тамуз, райондин тарихдин ва тIебиатдин гуьзел чкайриз экскурсийриз фена. И кар давамарзава.
Лагерда аялриз ватанпересвилин тербия гунни фикирдай акъуднавач. И мураддалди Донбассда махсус серенжемдин иштиракчи Агьмедов Эдуард Надировичахъ галаз мукьвара гуьруьш тешкилна.
Физкультурадин муаллим Керим Бабаева аялрихъ галаз спортдин серенжемар кьиле тухузва. Лагердин кIвалах школадин директор Ифриз Бабаевадин кьетIен гуьзчивилик ква.
— Лагерда гьар са рекьяй кIвалах вини дережада аваз тешкилнава, — лугьузва Ифриз Бабаевади. – Лагердин руководителдин, тербиячийрин, техработникрин кIвалахдилай зун гзаф рази я.
«Чубарук» лагердин кIвалахдилай райондин образованидин управленидин начальник Гьуьсейн Шихбабаев, аялрин диде-бубаярни гзаф рази я.
Хазран Кьасумов
