Алатай гьафтедин эхирра, РД-дин Гьукуматдин Председателдин Сад лагьай заместитель Руслан Алиеван регьбервилик кваз кьиле фейи заседанидин сергьятра аваз, Украинада кьиле физвай дяведин махсус сернежемдин (СВО) иштиракчийрин хизанриз яшайишдин рекьяй куьмекар гунин месэлани веревирдна.
Р.Алиева къейд авурвал, Дагъустандин Кьил Сергей Меликован тапшуругъдалди махсус серенжемда иштиракзавай гьар са дагъустанвидин хизандиз талукь яшайишдин паспортар арадал гъанва. Абуруз жуьреба-жуьре рекьерай куьмекзава (мисал яз, кIвалахдай чкайралди таъминариз, аялар кIелуник кутаз ва икI мад). Са гафуналди, и хизанар датIана гьукумдин органрин гуьзчивилик ква.
Сад лагьай вице-премьерди гьакIни хабар гайивал, республикадин кьилевайбурун тIварцIихъ махсус серенжемда хирер-кьацIар хьанвай аскеррин патай арзаяр къвезва. Кьилди къачуртIа, абуру СВО-да хирер хьанвайбур патал региондин дережада аваз махсус пособие арадал гъун тIалабзава. Арзайриз баянар гудайла, Р.Алиева алава хъувурвал, уьлкведин са кьадар регионра ихьтин пособияр арадал гъанва. «И кардихъ галаз алакъалу яз, захъ ихьтин теклиф ава: Дагъустандани республикадин бюджетдин гьисабдай ихьтин пособие кардик кутуртIа, хъсан я», — лагьана ада.
Мегьамед Ибрагьимов
