Дагъустандин агьалийриз «Мегафондин» патай меслятар

Зегьемвили неинки инсанриз, гьакI техникадизни, гьа жергедай яз смартфонризни, пис патахъай таъсир ийизва. «Да­гъустан» РИА-ди хабар гузвайвал, «Мегафондин» пешекарри республикадин агьалийриз чими вахтунда телефонар ишлемишунин жигьетдай бязи меслятар гана.

Ифин акьалтуникди гзафни-гзаф аккумуляторриз хасаратвал жезва, еке чимивили абура химический реакция арадал гъизва, идан таъсирдикди батарея гьатта дакIунни мумкин я. Гаджетдин (телефон, планшет) кIвалах къайдадик кумукьун патал компаниядин пресс-къуллугъди теклифзава:

 гаджетар ракъиник тамир, иллаки кIеви авунвай машинда, тахьайтIа, батареядин зарядка ацукьун ва я аппарат вич-вичиз туьхуьн, гьатта ам михьиз къайдадикай хкатунни мумкин я;

 фондин режимда аваз кIвалахзавай герек авачир приложенияр агала, зегьемдикди еке файлар загрузка ийимир, «Wi-Fi» хкуд. Телефондин процессорди гьикьван тIимил кIвалах авуртIа, гьакьван адан температура агъузди жеда;

 экрандин экуьвал тIимилара, и къайдада куь телефондин зарядка чими чкада яргъалди амукьда;

 телефон лап ифей дуьшуьшра адав тади гьалда «сифте куьмек» агакьара: гаджетдилай чехол ва хуьдай (защитный) пленка алуд, и карди ифин алатун артухарда. Эгер телефондиз зарядкадал алай вахтунда ифин акъатнаваз хьайитIа, токдикай хкуд. Аппарат мичIи ва къайи чкада эциг. Ихьтин дуьшуьшра гаджет холодильникда эцигуналди, муркIада, це туналди къайи ийиз алахъмир, садлагьана температура аватун электроника патал хаталу я. Куь телефондиз ял ялдай мумкинвал це, са кьадар вахтунда, вичин адетдин къайдадиз хтун тавунмаз, ам ишлемишмир.

Муса Агьмедов