22-июлдиз РД-дин Гьукуматдин Председателдин заместитель Нариман Абдулмуталибов ва республикадин хуьруьн майишатдинни недай суьрсетдин министр Мухтарбий Аджеков Кьиблепатан Дагъустанда государстводин «Хуьруьн мулкар комплекснидаказ вилик тухун» программа кьилиз акъудзавай гьалдихъ галаз таниш хьана. Идакай «Лезги газетдиз» Дагъустандин Гьукуматдин пресс-къуллугъди хабар гана.
Сифте нубатда абур Ахцегь районда тIвар кьунвай программадин сергьятра аваз эцигнавай кIелдай 120 чка авай мектебдиз фена. Роспотребнадзорди санитариядин рекьяй винел акъуднавай бязи кимивилер квачиз, мектеб ишлемишиз вахкуз жедай гьалда ава. Роспотребнадзордин вири истемишунрал амал авунин важиблувал фикирда кьуна, Н.Абдулмуталибова пудратчи карханадин векилдал кимивилер энгел тавуна, арадай акъудун тапшурмишна.
Гуьгъуьнлай абур Ахцегь районда эцигзавай спорткомплекс авай гьалдихъ галаз таниш хьана. Пудратчи карханадин векилди гайи малуматрал асаслу яз, эцигунрин кIвалахрин 95 процент акьалтIарнава. Н.Абдулмуталибова 1-сентябрдиз объект ишлемишиз вахкун патал хъувуна кIанзавай кIвалахар, энгел тавуна, вахтунда ва хъсан ери аваз куьтягьуниз эвер гана.
И юкъуз республикадин гьукуматдин векилар СтIал Сулейманан райондин Агъа СтIалрин-Къазмайрал эцигнавай, кIелдай 400 чка авай мектебдизни мугьман хьана.
Къейд ийин хьи, винидихъ тIварар кьунвай кьве мектебни алай йисан 1-сентябрдиз ачухун пландик кутунва. Н.Абдулмуталибова чкадин администрацийрал ва пудратчи карханайрал гатун эхирралди винел акъуднавай вири кимивилер туькIуьр хъувун кьетIен гуьзчивилик кутун тапшурмишна. Августдин сад лагьай паюна РД-дин хуьруьн майишатдин ва недай суьрсетдин министрдин заместитель Зураб Къуччаева и жигьетдай кьиле тухузвай кIвалах авай гьалдиз къимет гудайвал я.
Мегьамед Ибрагьимов
