Кьилиз акъудзава

Дагъустандин эцигунрин, архитектурадин ва ЖКХ-дин министерстводин къуллугъчи Марат Асланова къейд авурвал, Дагъустандихъ яшайишдин кIвалер эцигна, ишлемишиз вахкунин жигьетдай тайинарнавай план артухни алаз тамамардай фикир ава.

2023-йисан эхирдалди республикади 1,13 миллион кв. метрдилай тIимил тушиз яшайишдин кIвалер ишлемишиз вахкун пландик кутунва.

Министерстводин векилди къейд авурвал, республикада йисан сифте паюна 419 агъзур кв. метрдин яшайишдин кIвалер ишлемишиз вахканва. Им, алатай йисан и вахтунив гекъигайла, 41 процентдин гзаф я. Гьа са вахтунда Дагъустанда хсуси кIвалерилай кьакьан мертебайрин кIвалер са тIимил гзаф эцигзава.

Кьадар дегиш хъхьанва

Чна виликдай, бязи СМИ-рин малуматрал асаслу яз, Махачкъаладин гьуьлуьн портуна лазим тир шартIар тешкилун патал аниз физвай рехъ цIийикIа туькIуьрунин месэла гьялзавайдакай ва яргъивили 6,7 километр тешкилзавай и рехъ туькIуьрун патал тахминан 4,5 миллиард манат пул харждайдакай хабар ганай. Гуьгъуьнлай са жерге чешмейри и рехъ къайдадиз гъун патал 4,9 миллиард манатдилай артух пулдин такьатар серфдайди раижнай.

«Дагъустандин экономика» телеграмм-каналди хабар гузвайвал, гила и серенжемдиз акъатдай пулдин кьадар мадни дегиш хъхьанва. ИкI, РФ-дин  транспортдин министерстводин делилралди, Дагъустандин меркездин гьуьлуьн портуниз физвай рехъ цIийикIа туькIуьр хъувун патал, санлай къачурла, 5,5 миллиард манат акъатда­.

ГьакIни чешмеди къейдзавайвал, цIийи рехъ туькIуьрун патал чилин са жерге участокар маса къачуда ва саки 30-далай виниз объектар чукIуруниз мажбур жеда.

Дагъустанда – электромобилар

Дагъустандин энергетикадин ва тарифрин министерстводин делилралди, рес­публикадин рекьера саки 300 электромобиль гьалзава. Виликамаз раижнавай рекъемралди, 2025-йисуз абурун кьадар — 2,5 агъзурдав, 2030-йисуз 22 агъзурдав агакьун мумкин я.

Гьа са вахтунда алай йисуз регионда электромобилар патал тади гьалда зарядка ийидай 9 станция пайда жеда.

Министерстводин пресс-къуллугъди къейдзавайвал, ихьтин станцияр эцигзавай карчийриз са жерге кьезилвилер (льготы) ава. Месела, абуру герек тир тадаракар маса къачун патал харжнавай пулунин 60 процент субсидияр яз вахчуз жеда. Амма субсидийрин умуми кьадар 1 миллионни 860 агъзур манатдилай артух хьана кIандач. ГьакIни электромобилар зарядка ийидай къурулуш электричестводин сет­рик кутуниз акъатзавай харжияр 30 процентдин кьезиларда. Ихьтин кьезилвилерин кьадар, санлай къачурла, 900 агъзур манатдилай артух жедач.

Завод эцигун мумкин я

Дагъустанда керпичар акъуддай завод эцигун мумкин я. Ихьтин проект кьилиз акъуддай ният «Керамин» ООО-дихъ ава.

«Дагъустандин экономика» телеграм-каналди кхьизвайвал, инвесторриз йисан къене керамикадин 48 миллион керпич акъуддай завод арадал гъиз кIанзава.

Эцигун мумкин тир и объект «Каспийск» ТОСЭР-дин (территория опережающего социально-экономического развития) мулкунал хкажун пландик кутунва.

ГьакIни, проектдин сергьятра аваз, кIвалахдай 110 чка арадал гъун фикирда кьунва. Республикадин гьукумдихъ и проект кьилиз акъудун патал инвестордиз чил тулкI тавуна чара ийидай ният ава.

Муса Агьмедов