Дагъустанда инсанрик ярарин азар (корь) акатзавай дуьшуьшар давам жезва. Идакай ислен юкъуз Махачкъалада Сергей Меликован регьбервилик кваз кьиле фейи совещанидал Роспотребназордин РД-да авай Управленидин кьил Залимхан Омариева хабар гана.
Адан гафаралди, и азардиз акси рапар ягъунин нетижада республикадин бязи шегьерра ярар акатзавай инсанрин кьадар тIимил хьанва. Ихтилат Махачкъаладикайни Хасавюртдикай физва.
Гзафни-гзаф и азар аялрик акатзава. Роспотребнадзордин делилралди, и кардин асул себеб ярариз акси рапар ягъ тавунихъ галаз алакъалу я. З.Омариева арадал атанвай гьаларин вилик пад кьун патал вакцинациядин еришар йигинарун теклифна.
С.Меликова къейд авурвал, арадал атанвай гьалар тади гьалда къайдадик кухтуна кIанда. Ада и месэладин патахъай жавабдар органрал герек тир серенжемар кьабулун тапшурмишна.
Ярар акатай чIавуз бедендин чимивал 40 градусдив агакьда, хамунал пенек-пенек тIехвер пайда жеда, кьуру уьгьуьяр яда. Азардин вилик пад кьунин карда виридалайни менфятлу серенжем адаз акси раб ягъун я.
Агьмед Магьмудов
