Мегьарамдхуьруьн райондин Советский хуьруьн агьалийрикай гзафбуру мергьяматлувилин крара иштиракзава: рекьер, куьчеяр (къерехра турбаяр кутуна) гуьрчегдиз туькIуьрзава, кьилел дуьшуьш атайбуруз пулдин куьмекар гузва ва икI мад. Дугъриданни, бубайрилай инихъ авай хъсан адетриз вафалувал хуьн шад жедай кар я.
Чи хуьруьнви кьегьал хва Вагьабов Абдуллагьа лагьайтIа, дуллух тIимил тир, агъа кIанин кьадарда аваз пенсия къачузвай ксариз, санлай 21 хизандиз, 2023-йис патал «Лезги газет» кхьенва. Им, дугъриданни, лап хъсан кIвалах хьана. Сад лагьайди, им жуван хуьруьнбуруз ийизвай еке гьуьрмет, кьвед лагьайди, чи багъри «Лезги газет» вилик тухуник, идахъ галаз сад хьиз, хайи чIал хуьник кутазвай лайихлу пай я. Зи фикирдалди, ни лезги чIалаз, «Лезги газетдиз», лезги литературадиз, Лезги театрдиз гьуьрметзаватIа, гьам халис ватанперес я, абуруз чи лезги халкь, лезги ватан гзаф кIанзава лагьай чIал я. Сагърай ахьтин рухваяр! Ахьтин кьегьалрикай сад тир Абдуллагьазни аферин!
Чи мергьяматлу хва Абдуллагь гзаф йисара «Лезги газетдин» штатдик квачир мухбир, газетдин мягькем даяхрикай сад тир Ферид Вагьабован гада я. Лайихлу бубадин таъсирдик кваз чIехи хьайи адакай хуьруьнвийрин дерди-гьалдикай хабар кьадай, гьа са вахтунда хуьруьнвийривай вичелди дамахиз жедай инсан хкатна. Ада Санкт-Петербургдин са фирмада гьакъисагъвилелди зегьмет чIугвазва. Къуй адан берекатар Аллагьди мадни артухаррай!
Зейнедин Мурадов, зегьметдин ветеран
