Адет хьанвайвал, и йикъара Мегьарамдхуьруьн районда муниципалитетдин умуми образованидин мектебрин виридалайни виниз тир агалкьунар хьанвай выпускникар ва абурун диде-бубаяр шад гьалара къаршиламишунин мярекат кьиле фена. Муниципальный тешкилатдин кьил Фарид Агьмедова лап хъсандиз кIелуналди тафаватлу хьайи жегьилрив къизилдин медалар вахкана. «Чирвилер къачунин карда кьетIен агалкьунар хьунай» пишкешриз и йисуз райондин 23 выпускник лайихлу хьана.
«Къе иниз кIватI хьанвай жегьилар государстводин сад тир имтигьандал чпин чирвилер виниз тир къиметдиз лайихлу тирди субутнавайбур я. 11 йисуз абуру, са-са кам къачуз, къастунал кIеви яз, чеб къенин и йикъав – виниз тир пишкешдив агакьарна. Зун инанмиш я, куьне, илимдин мадни кьакьан кукIушриз хкаж хьуналди, уьмуьрда лайихлу чка жагъурда. Куьне гележегдихъ хъсан рехъ кьунва. Къуй куьн рикIе авай мурадрив агакьрай!», — лагьана Ф.Агьмедова. Ада гьакIни аялар лайихлу инсанар яз тербияламишунин карда гьакъисагъ зегьмет чIугур диде-бубайриз, муаллимриз, насигьатчийриз чухсагъул лагьана, тебрикар авуна.
Жегьилрив пишкешар вахкунин мярекатда райондин администрациядин къуллугъчийри, райсобранидин депутатри, образованидин управленидин векилри, мектебрин директорри иштиракна.
***
Мектебар акьалтIарнавай аялрив аттестатар, къизилдин медалар ва гьуьрметдин грамотаяр вахкунин шад мярекат Ахцегь райондин администрациядани кьиле фена.
Мярекатда гьакIни муниципалитетдин образованидин управленидин начальник Халидин Эльдарова, выпускникрин диде-бубайри, мектебрин директорри иштиракна.
КIелунин карда лап хъсан нетижаяр хьанвай аялар тебрикуналди, Ахцегь райондин кьил Абдул-Керим Палчаева абуруз вилик эцигнавай макьсадрив агакьарунин ва гьамиша еке мурадрихъ ялунин алхишар авуна. «Зун умудлу я, квелай чирвилерин рекье рикIик квай вири крар алакьда. Чун лагьайтIа, гьамиша патав жеда, куьмекда», — лагьана ада.
Выпускникрихъ галаз ихтилатар авурдалай ва абурун планрикай чир хьайидалай кьулухъ А-К.Палчаева къенин жаванар пака жегьил пешекарар яз хайи чилел хтуник умуд кутунвайдакай лагьана.
Халидин Эльдарова, медалистриз тебрикар авурдалай кьулухъ, абурун диде-бубайриз чухсагъул лагьана, абурун зегьмет екеди тирди къейдна.
Гуьгъуьнлай, гурлудаказ капар ягъуналди, жегьилрив аттестатар ва пишкешар вахкана.
Амина Муслимова
