СтIал Сулейманан райондин кьил Саид Темирханов муниципалитетдин умуми образованидин идарайра капитальный ремонтдин кIвалахар кьиле физвай тегьердихъ галаз таниш хьана, хабар гузва райондин информациядин къуллугъди.

Райондин образованидин управленидин  начальник  Гьуьсейн Шихбабаевахъ ва УКС-дин (капитальный эцигунрин управление) регьбер Роберт Мейлановахъ галаз санал ам ЦIийи хуьруьн  ва Агъа СтIалрин мектебриз  фена, пудратчи карханадин векилрихъ галаз ихтилатарна, эцигунрин ва ремонтрин кIвалахар кьиле физвай гьал ахтармишна, къимет гана.

Райондин кьилиз хабар гайивал, мектебра капремонтдин кIвалахар планда­ къалурнавайвал кьиле физва. Къейд ийин,­ СтIал Сулейманан райондин винидихъ чпикай лагьанвай мектебра бинедилай ремонт аву­нин кIвалахар государстводин «Мектебрин образованидин къурулушар алай аямдин истемишунрив кьадайвал туь­кIуьрун» программадин сергьятра аваз, фе­деральный бюджетдай субсидияр яз чара ийизвай такьатрихъ  тамамарзава.

Идалайни гъейри, образованидин объектдин мул­кар­­­ аваданламишунин, гьакIни террорист­рин гьерекатрикай хуьн таъминарунин кIва­ла­хар кьилиз акъудун патал муниципальный бюджетдай алава тир  такьатар чара авун фикирда кьунва. Ибурукай бязи кIвалахар бюджетдилай къецяй тир такьатрин гьисабдай кьилиз акъудда.

Саид Темирханова образованидин уп­рав­ленидин,  УКС-дин ва мектебрин  регьберрин рикIел хкайвал, эцигунрин ва ремонтдин кIвалахрин гьар са паюнал гуьзчивал авун чарасуз я. Идалайни гъейри, кIвалахар тайинарнавай вахтунда кьилиз акъудунни иллаки важиблу я: образова­нидин идарайра ремонтдин кIвалахар 15-августдалди тамамдаказ кьилиз акъудна кIанда.

Чи мухбир