И мукьвара Ахцегь райондин кьилин ктабханадин кIелдайбурун залда райондин «ЦIийи дуьнья» газетдин къвалав гвай эдебиятдин «Самурдин сес» кIватIалдин нубатдин заседание кьиле фена.
Адан кIвалахда Дагъустандин писателрин Союздин секретарь, машгьур публицист ва таржумачи Максим Алимова, филологиядин илимрин кандидатар ва РФ-дин писателрин Союздин членар тир Ахцегь райондин образованидин управленидин начальник Халидин Эльдаровани Фрид Кисриеван тIварунихъ галай жегьил натуралистрин станциядин (СЮН) директор Мадлена Гьажиевади, Ахцегьрин 1-нумрадин юкьван мектебдин муаллим, лезги писателрин Союздин член Жамиля Саидовади, райондин культурадин управленидин начальникдин заместитель, шаир Сулейман Сулейманова, и цIарарин авторди, Ахцегьрин 1-нумрадин юкьван мектебда кIелзавай Алина Мегьамедалиевади, Тахмина Мирзоевади, Карина Аллагьвердиевади иштиракна.
Заседанидин иштиракчияр алай вахтунда «Самурдин сес» тешкилат авай гьалдиз килигна (эхиримжи йисара адан членар – машгьур гьикаятчияр тир Абдулрашид Рашидов, Назир Мирзоев, Шихмурад Агъакеримов рагьметдиз финикди кIвалах зайиф хьанва) ва адан мумкинвилер ахтармишна. Абуру гьакIни райондин газетдин гъилевай йисан 27-нумрадин эдебиятдин чина ганвай авторрин шиирарни веревирдна. Эдебиятдин тешкилатдик цIийиз экечIнавай жегьилрин шиирар кIелна, абуруз шииратдин рекьяй хъсан теклифар гана. Гуьруьшдин иштиракчияр гележегда тешкилатдин заседанияр йиса кьве сефердилай тIимил тушиз тухунин меслятдал атана.
КIватI хьанвайбурун разивал аваз, заседанидал агъадихъ галай къарар кьабулна:
«Самурдин сес» тешкилатдин регьбервилин везифаяр шаир Сулейманов Сулейманан хиве тван;
райондин мектебра дидед чIаланни литературадин кабинетар къайдадиз хкана, анра литературадин яратмишунрин кружокар тешкилун лезги чIалан тарсарин тежрибалу муаллимрал тапшурмишин;
«Самурдин сес» тешкилатдин жергейриз литературадин яратмишунрал рикI алай жегьилар кьабулунин, абурухъ галаз кIвалахунин ва яратмишунар райондин «ЦIийи дуьнья» газетдиз чинра чап авунин месэлайриз кьетIен фикир гун.
Дашдемир ШЕРИФАЛИЕВ
