РД-дин Гьукуматдин Председателдин сад лагьай заместитель Руслан Алиеван идарадик кваз 17-июлдиз Дагъустан Республикадин экономика, къецепатан себебар фикирда кьуналди, дурумлудаказ виликди тухун таъминарунин рекьяй Оперативный штабдин заседание кьиле фена.
Вилик эцигнавай месэлайрик квай: Дагъустан Республикадин Кьил Чечень островдал финин нетижаяр, къанунрал амал ва государство идара авун таъминардай властдин органри бюджетдин такьатар харж авун, гьакIни Махачкъалада Гейдар Алиеван тIвар эбеди авуниз талукь комплекс туькIуьрун ва Урус муаллимдиз памятник реставрация авун, адан патарив гвай мулкар аваданламишун.
Заседанидин кIвалах башламишай Руслан Алиева рикIел хкайвал, алатай гьафтеда Дагъустандин Кьил Сергей Меликов Махачкъаладин администрациядин мулкарик акатзавай Чечень островдал кIвалахдин рекьяй мугьман хьанай.
«Вич алай чкадин жигьетдай кьетIенвал фикирда кьуна, островдиз талукь, тади гьалда гьялун истемишзавай са жерге четин месэлаяр ава. Ихьтин месэлайрикай яз, ана транспорт, интернет, электричестводалди ва чимивилелди таъмин тахьуникай лугьуз жеда. Бязи агьалийри чеб островдилай масаниз куьч жез гьазур тирди малумарна. И месэла гьялун патални мукьуфдивди эгечIун лазим я. Чи вилик квай асул месэла дагъустанвийриз, абур яшамиш жезвай чкадилай аслу тушиз, яшайишдин тамам шартIар тешкилуникай ибарат я – яргъа авай ва муракаб шартIарин районрин агьалийри властдин органрин патай дикъет ва куьмек бес тежезвайди гьисс авун лазим туш. Абур маса районра яшамиш жезвай дагъустанвийрихъ галаз сад хьтин къулай шартIара дуланмиш хьун лазим я», — лагьана Р.Алиева.
Региондин Кьил Чечень островдал фейидалай кьулухъ кьабулнавай къараррикай ва тапшуругърикай РД-дин Кьилин ва Гьукуматдин Администрациядин регьбер Алексей Гьасанова суьгьбетна.
Амина Муслимова
