РД-дин здравоохраненидин министерстводин пресс-къуллугъди хабар гузвайвал, алай йисуз Дагъустанда здравоохраненидин 74 объект капитальнидаказ ремонтда.
Министр Татьяна Беляевади республикадин Кьил Сергей Меликоваз хабар гайивал, вири 74 объектдихъ галазни государстводи икьрарар кутIуннава. Кьилди къачуртIа, алай вахтунда 63 объектдал эцигунринни монтаждин кIвалахрив эгечIнава. Амай 11 объектдал лагьайтIа, гьазурлухвилин ва сметадик дегишвилер кухтунин кIвалахар кьилиз акъудзава.
Мукьвал гележегдин планрик здравоохраненидин 10 объект цIийикIа туьхкIуьрун ва модулдин конструкцийрикай кIватIзавай 27 объект маса къачун, абур чкайрал монтаж авун ква.
Дагъустандиз — цIийи тадаракар
Винидихъ тIвар кьунвай чешмеди мадни хабар гузвайвал, и йикъара «Здравоохранение» милли проектдин сергьятра аваз республикадин онкоцентрадиз (РОЦ), некIедин железадин ракдихъ (РМЖ) галаз женг чIугун яз, цIийи жуьредин (яни алай аямдин ва бедендин амай чкайриз екез зарар тагана) операцияр кьилиз акъудиз жедай тадаракар хканва.
КьетIен жуьредин тадаракрал РОЦ-дин хирургри сад лагьай операция кьиле тухванва. Эгер виликдай, некIедин железадин рак авайбуруз операция ийидайла, патарив гвай лимфоузеларни атIуниз мажбур жезвайтIа, идани беден патал чIуру нетижа (лимфоотток чIурзавай) арадал гъизвайтIа, гила цIийи тадаракри анжах дакIун авай клеткаяр атIудай мумкинвал гузва. И къайда (флуоресцентный метод биопсии сторожевых лимфатических узлов) медицинада алай аямдинди ва инновациядинди я. Ам неинки некIедин железадин, гьакI маса органрин рак авайлани, ишлемишзава. ЦIийи къайдадин кьетIенвал адакай ибарат я хьи, адан куьмекдалди хирургди «сторожевой» лимфоузелар жагъурзава. Ахпа, абурай гъвечIи тIеквенар акъудна, биопсия къачузва. Материал ахтармишун патал лабораториядиз рекье твазва. И тегьерда эгечIуни инсандин бедендай дакIун квай чкаяр (раковые узлы) дуьм-дуьз, яни патарив гвай чкайрик хкIун тавуна, акъудиз, мадни бедендин маса чкайра метастазар авани, авачни чириз куьмекзава.
Пешекарри биопсиядин флуоресцентный къайда, некIедин железадин ракдихъ галаз женг чIугунал гьалтайла, «къизилдин» стандарт яз гьисабзава. Гила адакай Дагъустандани менфят къачудай мумкинвал хьанва.
Чи мухбир
