Мукьвара Ахцегь райондин администрациядин залда муниципалитетдин кьил Абдул-Керим Палчаеван регьбервилик кваз жегьилри уьлкведин Яракьлу Къуватрин жергейра икьрардин бинедаллаз къуллугъ авунин месэлайриз талукьарнавай совещание хьана. Адан кIвалахда РД-дин Халкьдин Собранидин депутат Мегьамед Алиханова, райондин депутатрин собранидин председатель Мегьамедхан Алисултанова, Ахцегь, Докъузпара ва Рутул районрин военный комиссар Рафик Мегьамедова, хуьрерин кьилери, жемиятдин тешкилатрин векилри ва теклифнавай маса ксари иштиракна.
Абдул-Керим Палчаева къейд авурвал, лазим атай чIавуз Ватан душманрикай хуьн – им итимдин эвелимжи буржи ва намусдин кар я. «Нацистрини фашистри кьил хкажна, чи уьлкведин мулкарин битаввал патал хаталувал арадал гъанвай девир, гьакъикъатдани, хайи Ватандин азадвални аслу туширвал таъминарна кIанзавай, гележегдин кьисмет гьялзавай кьетIенди я. Чи хейлин рухвайри, Украинада кьиле физвай дяведин махсус серенжемда сифте йикъалай жуьрэтлувилелди душмандин хура акъвазна, игитвилин чешнеяр къалурзава. Энвер Набиев РФ-дин Игитдин тIварцIиз, парабур «Жуьрэтлувиляй» ордендизни маса шабагьриз лайихлу хьанва. Дяведа, гьайиф хьи, къурбандарни жезва. Ватан патал чанар гайи кьегьал рухваяр эбеди яз чи рикIера амукьда.
Серенжемда иштиракзавай чи аскерриз куьмек хьун патал мумкинвал авай жегьилриз гуьгьуьллувилелди икьрардин бинедаллаз РФ-дин Яракьлу Къуватрин жергейра къуллугъ авун теклифзава. Ахцегь райондай и къайдада къуллугъзавайбурун кьадар са акьван пара туш. Къейд ийин хьи, икьрардин бинедаллаз къуллугъзавайбуруз хъсан мажибарни гузва (жергедин аскердиз вацра — 204 агъзур манат). Идалайни гъейри, абурун хизанризни яшайишдин рекьяй бязи кьезилвилер жезва», — лагьана райондин кьили.
Военный комиссар Рафик Мегьамедован гафаралди, планда къалурнавай рекъемар фикирда кьуртIа, Ахцегь районда авай военкоматдай йисан къене икьрардин бинедаллаз къуллугъдай 71 кас рекье туна кIанзава. «Гьелелиг чавай вилик акъвазнавай месэла гьялиз хьанвач. Чкайрал хуьрерин администрацийрин, жемиятдин тешкилатрин векилрин, депутатрин активный куьмек галачиз и кIвалах зайифдаказ кьиле физва. Ихтилат физвай кардин патахъай гъавурдик кутунин кIвалах, сифте нубатда кIвалахдай чкадал таъмин тушир, ЦЗН-дин учётда авай ва я виликдай суд-дуванрик акатуникди пешедай кIвалах жагъин тийизвай ксарихъ галаз тухвана кIанда», — къейдна Рафик Мегьамедова.
Военный комиссарди совещанидин иштиракчияр икьрардин бинедаллаз Яракьлу Къуватрин жергейра къуллугъзавайбур патал (абуруз дяведин иштиракчидин дережани гузва) тайинарнавай яшайишдин кьезилвилерихъни заминвилерихъ галаз танишарна. Мадни ада, икьрардин бинедаллаз къуллугъзавайбуру хкязавай махсус пункт, виликдай хьиз, Астраханда ваъ, Махачкъаладин Кировский райондин администрациядин дараматда (Керимован куьче, 43) авайдакай хабар гана.
Совещанидал веревирдзавай месэладин гьакъиндай чпин фикирар мадни Мегьамед Алиханова, райондин ветеранрин советдин председатель Нажмудин Гудаева, райондин культурадин управленидин спортдинни жегьилрин сиясатдин отделдин начальник Гьажимурад Парпачева, райондин дишегьлийрин Советдин председатель Таира Муспагьовади, Цуругърин, Чеперин, КьакIарин хуьрерин кьилер тир Шемсидин Мерданова, Алимегьамед Гьуьсейнова, Багъир Забитова ва масабуру лагьана. Чпин рахунра абуру къиметлу меслятарни теклифар гана ва Украинада кьиле физвай дяведин махсус серенжемда къуллугъзавай аскеррин хизанриз яшайишдин рекьяй куьмекар гун важиблу кар тирди къейдна.
Дашдемир Шерифалиев
