10-июлдиз Дагъустандин госуниверситетда чирвилер къачун агалкьунралди акьалтIарай жегьил пешекаррив яру дипломар вахкунин шад мярекат кьиле фена – документар 533 студентдив агакьна.
РФ-дин Гимн тамамарайдалай кьулухъ Даггосуниверситетдин ректор Муртазали Рабаданова кIелунин йисан нетижаяр кьуна, выпускникриз важиблуди тир и йикъав агакьун мубаракна.
«Образованидин программаяр цIийи хъувун ва идахъ галаз алакъалу документация гьазурун себеб яз, алатай кIелунин 2022-2023-йис университетдин вири коллектив патал муракабди хьана. ДГУ-да нетижаяр кьадай государстводин аттестация, санлай къачурла, 3870 жегьил пешекар ахъаюналди акьалтIна: виниз тир образование аваз – бакалавриатдин 35 хиляй, специалитетдин 5 пешедай, магистратурадин 29 рекьяй; юкьван пешекар образование аваз – 4 пешедай. 2023-йисуз амайбурулай тафаватлу яз кIелун акьалтIарна: высший образованидин программайрай ва кьилин вузда – 533 касди (22 процентди), филиалра – 82 касди; юкьван пешекар образованидин программайрай: кьилин вузда – 64 касди, филиалра – 54 пешекарди. Зи фикирдалди, ибур лап хъсан нетижаяр я. Заз квез хъсан кIвалах жагъурунай алхиш ийиз кIанзава. Магистратурада кIелиз кIандайбур аватIа, чна куьн ДГУ-да гуьзлемишда», — къейдна вуздин ректорди.
Студентрин чирвилерин дережа винизди тирдакай РД-дин Халкьдин Собранидин Председатель, гьа са вахтунда «Юриспруденция» хиляй государстводин имтигьанрин комиссиядин председатель Заур Аскендаровани лагьана. Ада къейд авурвал, выпускникрин санлай къачур кьадардикай тахминан 58 процентди государстводин имтигьанар ва дипломдин кIвалахар «лап хъсан» ва «хъсан» къиметралди вахкана. Юридический институтдин выпускникрихъ лагьайтIа, адан гафаралди, агалкьунралди кIвалахун патал виниз тир чирвилер, тежриба, алакьунар ава.
ДГУ-дин юридический институтдин выпускникрив яру дипломар Государстводин Думадин депутат Бийсултан Хамзаева вахкана.
«Ина исятда авай ксар вири Дагъустандин образованидин хилен элита я. Заз квекай гьар садаз уьмуьрда вичин чка жагъана кIанзава. Савадлу инсан – им прогресс я. Къуй квекай и прогрессдин чешмеяр хьурай», — лагьана ада.
Выпускникрин патай тебрикдин гафар ДГУ-дин филологиядин факультет акьалтIарнавай, Р.Гьамзатован тIварцIихъ галай стипендиядиз лайихлу хьайи Рамазан Рамазанова лагьана.
«Университет гележегдин пешедин бине кутаз башламишзавай чка я. Халисан пешекаррин гъилик чирвилер къачудай мумкинвал хьунай къе зун жуван кьисметдилай рази я. Инанмиш я, ина авай гьар са студентди гьакI фикирзава». – лагьана ада.
Чи мухбир
