Алай йисуз Дагъустанда ЕГЭ 11 агъзурдалай гзаф жегьилри вахкана. Виридалайни виниз баллар 29  касди къазанмишна. Табасаран райондин Татиль хуьруьн мектеб акьалтIарнавай  Гьаваханум Мегьамедовади 100 баллдин къиметар урус чIалайни биологиядай къачуна. Идакай ДИРО-дин пресс-къуллугъди хабар гузва.

Чна идалай виликни хабар гайивал, Государстводин сад тир имтигьан тухун патал республикада 64 пункт (ППЭ) кардик кутунвай. Тешки­латчивилин ва технический месэлаяр­ гьялун 235 пешекарди таъминарна.

Чарасуз тир 2 предметдилай гъей­ри­, малум хьайивал, мектебар акьал­тIарзавай аялрин чIехи паюни общест­вознанидай ЕГЭ хкяна. Амма вирида­лайни виниз тир баллар къазанмишай кIвалахрин чIехи пай  урус чIалай я – 30-дакай 13 кIвалах. Мад 9 касди хи­миядай ЕГЭ 100 баллдалди вахкана­.  Биологиядай виниз тир баллар 4 выпускникди къачуна, физикадай, профиль­ный математикадай, литературадай ва ИКТ-дай —  гьар тарсунай 1 жегьилди.

Баллрин юкьван гьисабдин кьадардикай рахайтIа, виридалайни винизди урус чIалай ЕГЭ-дал къейднава – 53,99 балл.  Виридалайни агъузди – географиядай (39,09 балл). Профильный математикадай юкьва­н гьисабдин балл 43,7-даз барабар хьана, обществознанидай – 42,96, ли­тературадай – 49,03, химиядай — 41,1,  физикадай – 42,1, тарихдай – 41,5, ингилис чIалай – 49,2, информатикадай – 45,8, биологиядай – 44,5.

Хабар гузвайвал, Государство­дин­ сад тир имтигьан асул вахтунда­ вахкуз тахьай жегьилривай аттес­тат, им­тигьанар алава тир вахтунда — 6-19-сентябрдиз вахкуналди къачуз жеда.

Къейд ийин, эхиримжи са шумуд йисуз виридалайни виниз тир балл­ралди ЕГЭ вахкай жегьилрин лап чIе­хи паюни гележегда кIелун давамарун патал медицинадин вузар хкяза­ва. Ла­гьана кIанда хьи, медицинадихъ га­лаз алакъалу пешеяр неинки­ са Да­гъустанда, гьакI вири уьлкведин майдандани машгьур я. SuperJob порталди кьиле тухвай ахтармишунри тестикьарайвал, духтурдин пеше кьвед лагьай чкадал ала- ам 13 процент  абитуриентри хкязава. Сад лагьай чка (28%) информациядин технологийрихъ­ галаз алакъа­лу пешейри­ ва пуд лагьайди (9%) инженерри кьунва. Идалайни гъейри, 2023-йисуз машгьур пешейрин жергеда алвердин рекьяй менеджерар, дизайнерар, маркетологар, муаллимар, финансрин аналитикар ава.

КIелиз экечIиз кIанзавай жегьил­рин фикир тIебии тушир интеллект­дихъ галаз кIвалахзавай инженердин­ пешедални желбзава. Алай вахтунда­ ихьтин технологияр чIехи компа­ний­ра гегьеншдаказ ишлемишиз­ баш­ла­миш­­за­ва. Игьтияж винизди тир пешейрин арада SMM-ме­нед­жер­дини информациядин хатасузвилин хилен пешекарди лайихлу чкаяр кьунва.

Чи мухбир