И йикъара Дагъустандин госу­дар­­­ст­водин технический универ­си­тет­да адетдиз элкъвенвай вы­пускник­рин мекера (ярмарка), гьакI­ни амай­­бурулай тафаватлу тир дип­ломар вахкунин шад мярекат кьиле фена.

ИкI, 40-далай гзаф компанийри­ ва тешкилатри  университетдин дегьлизда чпин майданар ачухна – ина вуз акьалтIарзавай жегьил пешекарриз  анкетаяр ацIурдай, чпикай делилар (портфолио) агакьардай, гьакIни карханади акъудзавай продукциядихъ, кIвалахдин къайдадихъ галаз  таниш жедай мумкинвал ава.

КIвалахдалди таъминарун мумкин тир компанийрин арада ава: Махачкъаладин ЦНЗ, Дербентдин илимдинни ахтармишунардай «Волна» институт», жегьилрин общественный «Вирироссиядин студентрин къутармишдайбурун корпус» тешкилатдин Дагъустандин  региондин отделение, «Прайм Медикал Сервис» ООО (Москва), «Электроснаб» ООО, «Проминжениринг» ООО, РД-дин ГБУ «Даг­техкадастр» ва масабур.

Мекера дипломар вахкунин мярекатдилай башламишна. ДГТУ-дин ректордин везифаяр тамамарзавай Назим Баламирзоева студент­риз лап хъсандаказ кIелунай, университетдин общественный уьмуьрда активнидаказ иштиракунай чухсагъул лагьана, фадлай гуьзлемишзавай яру дипломар ва «ДГТУ-дин отличник» знакар агакьун тебрикна.

Вуз акьалтIарнавай жегьилриз алхишдин ва  насигьатдин гафар мярекатдин гьуьрметлу­ мугьманрини — РД-дин Гьукуматдин Председателдин заместителар Муслим Телякавова, чилин ва эменнидин алакъайрай министр Заур Эминова, гьакI образованидин ва илимдин министр Ягья Бучаева лагьана.

Эхирдай Назим Баламирзо­ева муаллимриз ва диде-бу­бай­риз накьан аялрикай лап хъсан инсанар авун патал чIугур зегьметдай чухсагъул малумарна.

«Гьуьрметлу выпускникар! Чи рес­публикадин ва уьлкведин гележег квелай аслу я. Зун инанмиш я,  и йисара вузда къачур чирвилери ва алакьунри квез гележегдин уьмуьрда екез куьмекда. Хайи университетди квел дамахун патал вири къуватар ишлемишдайдал шак алач», — лагьана ада.

Мярекат зегьметдин уьмуьрдиз сифте камар вегьезвай жегьил пешекарри карханайрин регьберрихъ, векилрихъ галаз суьгьбетар авуналди давам хьана.

Амина  Муслимова