Алатай гьафтеда Дагъустанда РСФСР-дин лайихлу муаллим Зейнидин Азизагъаеван тIвар эбеди рикIел авунин лишан шад гьалара ачухна. Ада гила Каспийск шегьерда авай музыкадинни хореографиядин рекьяй образованидин государстводин гимназиядин-интернатдин дарамат къешенгарзава.
Кьул ачухуниз талукьарнай шад митингда РД-дин образованидин ва илимдин министерстводин умуми образование виликди тухунин управленидин меслятчи Лейла Арсланбеговади, Каспийск шегьердин администрациядин кьилин заместитель Казбек Демирова, педагогикадин зегьметдин ветеран, РД-дин лайихлу муаллим, РФ-дин умуми образованидин Гьуьрметлу работник Вера Евсеевади, Зейнидин Азизагъаеван багърийри ва мукьва-кьилийри иштиракна.
Зейнидин Абасович Азизагъаев РСФСР-дин лайихлу муаллим, Дагъустандин халкьдин муаллим, СССР-дин просвещенидин отличник, ВОВ-дин иштиракчи ва зегьметдин ветеран лагьай тIварарин сагьиб я. Ам Ахцегь райондин КьакIарин хуьре 1925-йисуз дидедиз хьана. Зегьметдин рехъ ада 1941-йисуз башламишна. Дербентдин педучилище акьалтIарай ада сифтедай муаллим, ахпа хайи хуьре сифтегьан мектебдин директор яз кIвалахиз башламишна. И вахтунда адан чIехи ругуд стхади Ватандин ЧIехи дяведин женгера иштиракзавай. Зейнидинан рикIени дяведиз финин къаст авай. Адан тIалабун 1943-йисуз кьилиз акъудна – гьеле лап жегьил гада тир ам Кьиблединни РагъакIидай патан фронтдиз акъатна. Са женгина хер хьайи ам госпиталдиз рекье туна. Идалай кьулухъ, 1944-йисуз, Еревандин военный училище акьалтIарай Зейнидин Азизагъаев, младший лейтенантдин чинда аваз, Украинадин фронтдиз рекье туна. Дяве ада курсантрин взводдин командирдин къуллугъдал алаз акьалтIарна. 1946-йисуз, Маршал Говорова военный рехъ давамарун теклифнайтIани, Зейнидин Абасовича хайи ерийрал хтун ва вичин пешедив эгечI хъувун кьетIна.
Ахцегь райондин хуьрерин мектебра тарихдин ва физкультурадин тарсар гуз, ада гьар юкъуз 16-17 километрдин рехъ атIуз, дяведилай гуьгъуьнин акьалтIай четин шартIара аялриз чирвилерин экв багъишзавай. Са йис алатайла, 25 йисни тахьанвай Зейнидин Азизагъаев Ялахърин мектебдин директор, кьве йисалай Ахцегь райондин халкьдин образованидин отделдин заведующий жезва. И къуллугъ ада 11 йисуз кьиле тухвана.
Мектебрин бинеяр мягькемарунин ва аялар патал чкайрин кьадар артухарунин игьтияж авайдан гъавурда аваз, ам Ахцегьрин хуьре цIийи школа эцигунив эгечIна. Идалайни гъейри, адан кьетIен гуьзчивилик кваз райондин хуьрерани мектебрин дараматар эцигунин кIвалах кьиле физвай. З.Азизагъаеван гьакъисагъ зегьмет фикир тагана амукьнач: Дагъустандин халкьдин образованидин министр М.Омарова адаз Каспийскдин школа-интернатдиз регьбервал гун теклифна. Зейнидин Абасович рази хьана ва цIийи кIвалахдив гьевеслудаказ эгечIна. Адан идарадик квай йисара школа-интернат музыкадинни хореографиядин рекьяй образованидин школа-интернатдиз элкъвена, 1996-йисуз лагьайтIа, лицейдин дережадив агакьна. 2002-йисуз лицейдикай музыкадинни хореографиядин образованидин гимназия-интернат хьана.
З.Азизагъаева жемиятдин уьмуьрдани активнидаказ иштиракзавай: ам райондин ва шегьердин депутатрин собранидин депутатвиле, Каспийскдин ветеранрин советдин членвиле, Вирисоюздин муаллимрин кьве съезддин делегатвиле хкянай 20 йисуз ДАССР-дин просвещенидин министерстводин коллегиядин член хьана. Чидай ксари, амадагри ам зегьметдал рикI алай, виниз тир акьул-камалдин, чирвилерин сагьиб, гзаф жумартлу юлдаш ва муаллим, насигьатчи хьайиди къейдзава. Вичин тежриба ада рикI алаз пайдай, жегьил муаллимар гъавурда твадай. Вичин къилихралди, ва кIвалахда агалкьунралди Зейнидин Азизагъаевича халкьдин арада еке гьуьрмет къазанмишна. 2005-йисан апрелдиз ам рагьметдиз фена. Педагогдин, камаллу насигьатчидин, гражданиндин, хъсан инсандин баркаллу крар, машгьур тIвар инсанрин рикIера эбеди амукьда.
Жасмина Саидова
