Алатай гьафтедин эхирра Сергей Ме­ликов военный махсус серенжем кьиле­ физвай чкада телеф хьайи военный къуллугъчийрин хизанрихъ галаз гуьруьшмиш хьана. Абурун арада СтIал Сулейма­нан райондайни хизанар авай: Уллугъетя­гъай­ тир Расулбег ва Магьият Мегьтихановар­ (Рос­гвардияда къуллугъай рагьметлу Имам Мегьтиханован диде-буба), Кьулан СтIалрилай — Марьям Велибегова (мобилизациядин сергьятра аваз тухвай рагьметлу Исамудин Велибегован диде).

Гуьруьшда СтIал Сулейманан рай­ондин­ кьил Саид Темирхановани иштиракна. Сифте нубатда  региондин Кьили телеф хьайи аскеррин багърийриз башсагълугъвал гана.

«Куь балаяр, стхаяр, итимар Ватан­дин халисан игитар я», — лагьана С.Ме­ликова ва и гафарилай кьулухъ, рагьметлубур эбеди рикIера амукьунин лишан яз, са декьикьада кисна акъвазна.

Региондин руководителди къейд авур­вал, военный махсус серенжем кьиле физ­вай майданра дагъустанвийри чеб лайихлудаказ тухузва. И кар Россиядин Президентдихъ галаз гуьруьшдални къейдна.

Военный къуллугъчийриз государстводин патай куьмек гуникай рахадайла, Да­гъустандин Кьили къейд авурвал, ихьтин куьмек гьам федеральный, гьам региондин дережайра гузва. «Куьмекдин жигьетдай лазим тир вири серенжемар кьилиз акъудунин кардик еке пай яша­йишдин «Вири санал» фондуни ва рес­публикада кIвалахиз башламишнавай госфондунин­ «Ватан хуь­дай­бур» отделениди кутазва. И отделе­нидин куьмекдалди СВО-дин иштиракчийрив ва абурун хизанрив  гьар жуьре хилерай куьмек агакьарда. ИкI, са вацран вахтунда 250-далай­ гзаф арзаяр гъилелай авунва. Фикир­ тагана, са хизанни тадач», — къейдна Да­гъустандин  Кьили.

Республикада РД-дин Халкьдин Соб­ранидин комитетдин председателдин заместитель Елена­ Ельниковадин идарадик квай «Сад тир Россия» партиядин Дишегьлийрин  гьерекатни алакъада ава. Партия­дин проектдин сергьятра аваз, военный къуллугъчийрин дидейриз, уьмуьрдин  юлдашриз ва хендедайриз лазим куьмек гуда.

СВО-дин иштиракчийриз ва абурун хизанриз куьмек гунин серенжемрикай тамамдаказ Дагъустандин военный комиссар Дайтбег Мустафаева, РД-дин зегьметдин ва яшайишдин рекьяй виликди финин министр Мурад Къазиева  ва «Ватан хуьдайбур» фондунин Дагъустандин филиалдин регьбер Мегьамед Рашидова суьгьбетна.

Вичин нубатдай яз,  женгинин гьере­кат­ра телеф хьайи аскердин вах Лидия­ Сахнинади  гьукумдин органрин ва къу­ват­дин­ къурулушрин руководителриз, военный къуллугъчийрин хизанрив гьуьр­метлудаказ эге­чIунай ва абурун арзайриз гъиле-гъил аваз фикир гунай разивилин келимаяр лагьана.

Региондин Гьукуматдин членри телеф хьайи аскеррин мукьва-кьилийрихъ галаз суьгьбетар авуна. Яшайишда гьалтзавай четин месэлаяр гьялиз куьмек гуниз талукь вири арзаяр гуьзчивилик кутада.

Амина Муслимова