10-июлдиз Махачкъалада РД-дин экономикадин ва мулкар вилик тухунин министерстводин дараматдин патав Россиядин Федерациядин Игит, офицер Мегьамед Нурбагандович Нурбагандоваз гуьмбет ачухуниз талукьарнавай мярекат кьиле фена. Ана Дагъустандин Кьил Сергей Меликовани иштиракна.

РикIел хкин, полициядин лейтенант М.Нурбагандов 2016-йисан июлдин вацра, чпин эвер гуниз муьтIуьгъ хьанач лугьуз, боевикри яна кьенай.

Гуьмбет ачухзавай мярекатдал Сергей Меликова М.Нурбагандов терроризмдизни экстремизмдиз акси женгина яржуниз элкъвейдакай лагьана. «Мегьамед Нурбагандова боевикрин вилик гардан кIирнач, абурун эвер гуниз акси экъечIна. Адан эхиримжи «КIвалаха, стхаяр!» келимаяр вири уьлкве тирвал чкIана ва неинки са къанун-къайда хуьдай органрин къуллугъчияр, гьакIни гьар са ватанперес патал девиздиз элкъвенва», — къейдна ада.

Игитдин буба, РФ-дин Госдумадин депутат Нурбаганд Нурбагандова вичин хцин къамат эбеди авунай республикадин кьилевайбуруз ва вири дагъустанвийриз сагърай лагьана.

«Лезги газет»