«Региондин гьафтедин» сергьятра аваз, РФ-дин Государстводин Думадин депутат Жамалдин Гьасанов Кьурагь райондин Аладаш хуьруьз кIвалахдин рекьяй мугьман хьана – ина 216 аялдиз чкаяр жедай мектеб эцигунин кIвалахар акьалтIарзава. Идакай чаз депутатдин пресс-къуллугъди хабар гана.
«…И мектеб «Сад тир Россия» партиядин теклифдалди арадал гъанвай «халкьдин» программадик кутунвай гзаф кьадар объектрин жергеда ава. И программадин асул макьсад мектебра пуд сменада кIелун арадай акъудунин гьакъиндай РФ-дин Президент Владимир Путинан ва Госдумадин Председатель Вячеслав Володинан тапшуругъ тади гьалда уьмуьрдиз кечирмишуникай ибарат я. Депутатрин дестедик квай маса амадагарни галаз чна ам кьилиз акъудунин вири паярал кьетIендаказ гуьзчивалзава. И гьерекатда четинвилер арадал атун мумкин я. Чун лагьайтIа, абур гьялунин карда куьмек гуз гьазур я…», — къейдна Ж.Гьасанова.
Мектеб эцигиз 2008-йисуз башламишнай. Эцигунрин кIвалахар икьван яргъалди давам хьунихъ гьар жуьредин себебар ава. Абурун арада кьилинбурукай сад чилин участок чара авунихъ ва хсусиятчивилин ихтиярар лазим къайдада тайинарунихъ галаз алакъалу я. И месэла гьялун яргъалди амукьунин себеб ам я хьи, Кьурагь райондин Аладаш хуьр Дербент райондин мулкунал алай куьчери малдарвилин чилерик акатзава.
Алатай йисан августдиз депутат Ж.Гьасанован тIварцIел и школадин директордилай, педколлективдилай, гьакIни Аладашдин хуьруьн администрациядин кьилелай аялар чкIидай гьалда авай куьгьне школадай алай аямдин истемишунриз жаваб гузвай, капитальнидаказ эцигнавай цIийи дараматдиз акъудуниз талукь тир ва са жерге маса месэлаяр гьялунин карда куьмек гун тIалабзавай чарар атана. Жамалдин Набиевича ва адан куьмекчийри лазим тир вири документар кIватIунин ва Дагъустан Республикадин Гьукуматдив агакьарунин карда тIимил зегьметар чIугунач. Алатай йисан сентябрдиз ада РД-дин Гьукуматдин Председатель А.Абдулмуслимовавай месэладиз фикир гун тIалабзавай чар рекье туна. Нетижада алай йисан 5-июлдиз РД-дин чилерин ва эменнидин алакъайрай министерстводи «Чилин участокдин мулкунин кадастрдин планда чилин участокди кьадай чкадин схема тестикьарунин гьакъиндай» къарар кьабулна.
«РД-дин Гьукуматдин и къарарди эцигунрин кIвалахрал кIукI гъунихъ галаз алакъалу гзаф кьадар четин месэлаяр гьялунин, лазим тир къурулушрихъ галкIурунин, гьакIни чирвилер гудай идаради кIвалахиз башламишунин вири шартIар кьилиз акъудиз куьмекда», — инанмишарна Ж.Гьасанова.
Чи мухбир
