Расул Гьамзатован — 100 йис
Дагъустандин халкьдин шаир Расул Гьамзатован 100 йисан юбилейдиз талукьарнавай мярекатар, виринра хьиз, СтIал Сулейманан райондин мектебрани, аялрин бахчайрани, ктабханайрани кьиле тухузва. Заз жуван уьмуьрдай Расул Гьамзатовичахъ галаз алакъалу са легьзе рикIел хкиз кIанзава.
XX асирдин Гомер СтIал Сулейманан 100 йисан юбилей къейдзавай вахт тир. Агъа СтIалдал Москвадай, Ленинграддай ва уьлкведин чIехи маса шегьеррай гзаф мугьманар атанвай. Абур лезги халкьдин адетралди къаршиламишзавай. Музейдин вилик садрани тахьай кьадарда инсанар кIватI хьанвай. Вирида мярекатдин багьа мугьманрикай тир Сергей Михалковни Расул Гьамзатов вилив хуьзвай. Эхирни абур жемятдин вилик пайда хьана. Мугьманрихъ а вахтунда КПСС-дин райкомдин сад лагьай секретарь Ибадуллагь Тагьировни галай.
Чал, мухбиррал, жезмай кьван метлеблу легьзейрин шикилар ягъун тапшурмишнавай. Чна гзаф кьадар шикилар яна: музейдин гьаятда, къенепата ва суварин мярекатар кьиле фейи маса майданра. Сергей Михалкованни Расул Гьамзатован шикилни яна – СтIал Сулейманан чарпайдин ва истиканар, шекердан, маса къапар алай суфрадин патав.
И мярекатдилай гуьгъуьниз, са кьадар вахт арадай фейила, зун шикилар ягъиз чирдай кружокрин кьилевайбурун семинарда иштиракун патал Махачкъаладиз фенвай. За Расул Гьамзатовав вахкун патал шикиларни кьуна. Сергей Михалковаз лагьайтIа, почтадай рекье хтунвай.
Дагъустандин писателрин Союздин дараматдин 2-гьавадиз хкаж хьайи зун ина столрал суфраяр экIязавай, къаб-къажах гуьнгуьна твазвай дишегьлийри кьабулна. Абуру заз Расул Гьамзатовичан кабинет къалурна ва сада шаирдиз зун атанвайдакай хабар гана. Кабинетдиз фейила, Расул Гьамзатов, чкадилай къарагъна, ша, буюр лагьана, зи къаншардиз атана, заз ацукьун теклифна. За адаз жув атунин себеб лагьана ва шикилар авай папка столдал эцигна. Гагь заз, гагь столдал алай шикилриз килигиз, ам хъуьрезвай.
— Молодец, молодой человек, — лагьана Расул Гьамзатовича, — ибур юбилейдик янавай шикилар я. Сагърай вун! Масабурулай зал гьелелиг агакьнавай затI авач.
Шаирди заз а чIавуз Союзда авай мярекатдин суфрадихъ теклифна. Амма заз акъваздай мумкинвал авачир. Расул Гьамзатович зи гъавурда акьуна ва, разивилин келимаяр лагьана, ада зун рекье хтунай.
Райсудин Набиев
