Алай йисан каникулрин вахтунда СтIал Сулейманан районда Кьулан СтIалрин Радим Халикьован тIварунихъ галай, Эминхуьруьн Абдул Саидован тIварунихъ галай ва Цмуррин умуми образованидин юкьван школайра гатун лагерар ачухнава. И йикъара чун Эминхуьруьн школада кардик квай «Дружба» лагердиз фена.
Лагердин начальник Межидов Эшреф Межидовича лагьайвал, алай вахтунда ина 1-5-классра кIелзавай 100 аял ава. «Чун санал ала – им чи къуватни я» — им лагердин девиз я.
Чаз акурвал, лагерда аялриз ял ядай, чпин зигьин, кьатIунар артухардай, гьар жуьредин серенжемар кьиле тухудай вири жуьредин шартIар яратмишнава.
Дестейрин вожатыяр тир Рекъият Къарахановади, Важибат Жигеровади, Румина Рамазановади, Марал Базаевади аялрихъ галаз гьар жуьредин мярекатар кьиле тухузва. Идалайни гъейри, лагерда школьникриз экскурсияр тешкилунизни кьилин фикир гузва. ИкI, ина ял язавай аялар, кьилди-кьилди дестейриз пайна, Етим Эминан (Эминхуьр), СтIал Сулейманан (Агъа СтIал), Гъалибвилин (Цмур) музейриз, Эминхуьруьн мулкуна авай ПIирен там гапIалдиз, Къазмаяр участокда авай тутун багъдиз ва тIебиатдин гуьзел маса чкайриз тухвана.
Лагерда аялриз йикъа кьве сеферда чими тIямлу хуьрекар гузва. Ашпаз Зулфира Мисрихановади гьазурзавай хуьрекар аялри иштагьдивди незва.
Эшреф Межидова лагьайвал, 2-потокда лагердиз 5-8-классра кIелзавай 100 аял кьабулда.
Лагерда чал школадин директор Рагьман Османовни гьалтна.
— Чи школада гатун лагерь ачухун райондин руководстводи чаз авунвай чIехи ихтибар я. Идай чна чухсагъул лугьузва. И ихтибар кьилиз акъудун патал чна хъсандаказ кIвалахни ийизва, — лагьана Р. Османова.
Хазран Кьасумов
