Газетдин виликан нумрада чна хабар ганвайвал, июндиз Каспийскда азаддаказ кьуршахар кьунай Россия­дин чемпионвилин тIвар къазанмишай­ Шамил Мамедов алатай гьафтеда ви­чин хайи маканда,  Дербент райондин Белиж поселокда, шад гьалара къаршиламишна.

Мярекат ачухдайла, поселокдин кьил Рамиз Гьабибулаева Ш.Мамедован къас­тунин, руьгьдин кIевивал, адан гъалиб­вилер хьиз, ам акьалтзавай несилди чешне къачуниз лайихлу тирди къейдна. КIватI хьанвай ксари — абурун арада об­щественный тешкилатрин регьберар, спортсменар ва чемпиондин ярар-дустар авай – чи ватанэгьлидин тIварунихъ дуьньядин спортдин мадни кесерлу майданра вичин устадвал къалурдай къуватар хьана кIанивилин чими келимаяр ла­гьана.

КьетIендаказ мадни а кар къейд ийиз кIанзава хьи, «Врестдаг.ру» сайтди хабар гузвайвал, июндин вацра виридалайни хъсан спортсмен хкягъун патал соцсетра агьалийриз Россиядин чемпионатда гъалибвал къазанмишай 6 спорт­смендикай виридалайни хъсандан тIвар кьун теклифнавай. ИкI, Москвадин патай экъечIзавай Шамил Мамедоваз 33,3 процент респондентри сесер гана.

РикIел хкин: тренерар Жамал Алиеван ва Вагиф Къазиеван гъилик вичин ус­тадвал хкажзавай Ш.Мамедова Россия­дин чемпионатда кьиле тухвай 5 бягьс 42:4 гьисабдалди акьалтIарна. Гьамидован спортшколада вичихъ галаз санал вердишвилер къачузвай Ибрагьим Ибрагьимовахъ галаз финалдин бягьс гзафбуру и чемпионатда виридалайни гьейранардайди яз гьисабзава.

Рагнеда  Рамалданова